Vente à l'Hotel-Dieu de la Mairie de Champagne par Perrot Cœur de Fer

A tous ceus qui ces presentes lettres verront et orront Jehans de Monteigni, baillis de Vermendois et garde de la baillie de Senlis saluz. Nous fesons a savoir que pardevant Adam de Baerne et Jehan de Senlis, bourgeois de Biaumont seur Oyse auditeurs especialement a ce establis en ice leu du commandement le Roi et du nostre, vint presenz Parros Cuer de Fer escuiers fiels de Mesire Ansel Cuer de Fer d'Amblainville chevalier, et reconnu de sa volonté quil avoit et posseoit pesiblement une merie a Champaignes quil tenoit en fief du Roi de France. En laquelle mairie de sus dite li devant dis Perrot disoit appartenir un arpent de pré ou la entour, joignant d'une part au pré Madame Jehane de Sainte Genevieve et d'autre part a Ligier Le clerc et d'autre part au Patiz commun. Et un arpent de terre arable ou la entour seant en Val Roart joignant d'une part a la couture la Meson Dieu de Champaignes et d'autre bout a la terre de la prioré du Lai, et les saisines, les maailles des tavernes, et les garbes de don des terres a champart de tout ce que len tient de la Meson Dieu de Pontoise en la ville et es apartenances de Champaignes. Laquelle merie desus dite et toutes les apartenances et tous les droits que li dis Perros il reconnut de sa propre volenté sanz force fesant, lui avoir vendu et en non de vente quité a tous jours mais durablement, sanz riens retenir, au mestre, a la prieuse, as freres et as sereurs de la dite Meson Dieu de Pontoise et a ceux qui auront cause deus pour quarente livres parisis, siens quités, quil a euz et receuz en bons deniers contans des devant dis acheteurs et sen tint pour bien poiiez. En en quita et quite, clama les devant dis acheteurs et ceux qui auront cause deus. Et proumist par son loial creant et par sa foi quen encontre de cette vente il nira et quen en la dite merie riens ne reclamera ne fera reclamer par lui ne par autre des ores en avant, et que il garendira a ses propres cous aus devant dis acheteurs et a ceus qui auront cause deus la dite merie quite et delivre, et nient obligiee a autrui, especiaument contre ses freres de toutes choses que ils pouroient demander seur la dite merie pour reson des parties de la descendue de leur pere et de leur mere et pour reson dautres oblegances queles queles fussent, et contre tous autres presenz et avenir en jugement et hors jugement, as us et as coutumes du pais, et il desdomagera les desus dis acheteeurs et ceus qui auront cause deus de tous les cous et les domages que len auroit ou porroit avoir pour la deffaute de garandir la dite mairie et denteriner les convenances desus dites. Et reconnut les dis Perros quil sen estoit desvestus et dessaisis comme de vente en la main Robert de Champaignes a ce tans prevost de Biaumont. Et quant a la dite vente tenir enteriner et acomplir en la maniere quil est desus convenancié, li dis Perros en a obligié as devant dis acheteeurs et a ceus qui auront cause deus lui et ses hoirs et pour especial quant quil tient en la ville et au terroir de Croy et en la ville et au terroir de Beeloy de Jehan Cuer de Fer son ainsné frere, et tous ses autres biens muebles et non muebles presenz et avenir en quelque leu quils pourront estre trouvez a vendre et a despendre par la gent le Roi jusques a la valeur de la dite vente et des cous qui len auroit pour la deffaute de la dite vente enteriner, tenir et garantir ; des quielx cous il vout et octroia que li porteurs de ces lettres en feust creuz par son simple serement. Et a renoncié en cest fet li dis Perros, a ce que la dite somme dargent ne li ut esté paié des devant dis acheteurs et a ce quil n'ait esté deceuz de la moitié ou de outre la moitié dou juste pris de la dite merie. Et a tous privileges de crois prise et a prendre, et a toutes aides de droit de loi et de canon et a toutes exceptions peremptoires et dilatoires et a toutes decevances, barres, deffences et alegations qui encontre ces lettres porroient estre posés et alleguiés, et nuire as devant dis acheteurs et valoir au vendeeur desus dit. En tesmoing de cette chose et pour ce quelle soit ferme et estable, Nous avons seelées ces presentes lettres dou seel de la baillie de Senlis a la relation des auditeurs desus nommez, sauf le droit le Roi et lautrui, lan de grace nostre Seigneur mil deus cens qatrevins et sept ou mois davril le joedi apres Pasques closes.