Philippe de Beaumont approuve une concession viagère faite par les religieux du Val à Geoffroy Le Clerc de Champagne.

Ego Philippus frater Matthei comitis Bellimontis. Universis notum fieri volo tam futuris quam præsentibus quod abbas et conventus Vallis beatæ Mariæ concesserunt Gaufrido Clerico de Campaniis Domum quam habebant apud Campanias de dono Adæ Clerici cum proprisura eidem domui adjacente, et uno arpenno nemoris in costumis ad eamdem domum pertinente, et sex arpennos terræ de dono ejusdem Adæ liberos a campiparte, quam campipartem ego in eleemosynam ecclesiæ prescriptæ quitaveram. Concessit etiam præscripta ecclesia eidem Gaufrido illam partem terræ quam habebat in terra dominæ Marlæ cum prescripta domo et proprisura et arpenno nemoris et sex arpennis terræ cum campiparte quamdiu vixerit pacificæ tenendam cum eadem libertate quam ego præscriptæ ecclesiæ in prædicta domo et in sex arpennis terræ concesseram, ita videlicet quod domum illam liberam possidebit et quittam a foragio, rotagio, talliis, corveis et omnibus consuetudinibus et exactionibus : et eamdem justitiam quam ego in eadem domo et proprisura concesseram ecclesiæ Vallis ipse Gaufridus similiter nomine ecclesiæ possidebit. eo tenore quod si ipse Gaufridus vel servientes ipsius homicidium vel furtum vel aliud quispiam medleam (sic) scilicet vel aliud quodcumque super qua irretiri debeant in eadem domo aut in masura sua perpetraverint, tunc abbas omnem justiciam habebit. Si vero abbas justiciam non fecerit ego justiciam faciam. Præterea si extraneus quispiam furtum aut homicidium in prædicta domo aut in masura perpetraverit aut aliud quodcumque super quo irriteri debeat fecerit, tunc mea erit justicia. Cum vero idem Gaufridus obierit aut religioni se contulerit, præscripta domus cum porprisura et terris præscriptis et arpenno nemoris ad ecclesiam Vallis libere revertetur, ea conditione quod si aliquam meliorationem aut emendationem sive in domo sive in terris fecerit, omnis illa melioriatio sive emendatio libera et quitta cum domo et terris ecclesiæ Vallis remanebit. Sciendum etiam quod jam dicta domus quatuordecim denarios Belvacensis monetæ in festo sancti Joannis et unam minam avenæ in Natali Domini præfato Gaufrido aut alio cuicumque eam nomine ecclesiæ tenuerit, reddet, census vero quatuordecim denariorum et una mina avenæ qui pro domo mihi annuatim debet persolvi, ecclesiæ Vallis pro salute animæ meæ liber et quittus remanebit. Census autem qui pro terra sex arpennorum mihi redditur annuatim in festo Sancti Remigii, mihi persolvetur. Quod ut ratum et firmum teneatur præsentem cartam conscribi et sigilli mei impressione has conventiones firmas et ratas habens, feci corroborari. Acto anno ab incarnatione Domini millesimo centesimo nonagesimo tertio .