Accord, devant les seigneurs de Galardon, entre l'abbaye de Saint-Père de Chartres et Hervé et Jean Le Breton.

A tous ceus qui verront présentes lettres, Robert de Galardon et Mahé de Malli, chevaliers, seigneurs de Galardon, saluz en nostre Seigneur. Sachent tuit que comme contens fust entre religieus homme l'abé et couvent de Saint Père de Chartres d'une part, et Hervé Le Breton d'Essarz et Jehan le fuiz celui Hervé, d'autre part. Sur ce que li devant dis abé et couvent disoient et proposoient en droit par devant nous contre lesdiz Hervé et Jehan que cil avoient extirpé par eux ou par leur force et nuisance les vignes que les diz religieus ont à Gouherville, et pour ce requéroient les diz religieus pour les dommages et dépens de l'estragement des vignes et pour le briseiz de leur justice doudit leu, cent mars d'argent leur estre renduz. Fussent encore contenz entre lesdites parties sur ce que cil religieus disoient que Ysabel, la femme feu Girart de Gouherville, jadis serjant au devant diz religieus avoit ateinz comme condampnez et convaincuz les diz Hervé et Jehan dou murtre cil Girart, son mari, douquel elle les avoit poursui par devans nos : sur les contez devant diz et suo tous autres contenz, quereles, actions et arrages les devant dites parties vindrent amiablement à cete par, de conseil de preudeshommes : que li devant diz Hervé et Jehan et leur fames, Edelin fame audit Hervé et Marguerite, fame audit Jehan, quiterent par devant nos ausdis abé et couvent toutes les terres arables que li et leurs fames avoient assises en la seigneurie de Saint Père de Chartres à Gouherville, et voudrent et otroierent que toutes les terres devant dictes saient propre seignourie et hérige au diz religieus a tous jours maz..... Ce fut fet en l'an nostre Segneur mil et sexante et VIII, ou mois de mai.