Jean de Nanteuil approuve la donation de Jean de Lagny.

A toz cels qui verront ces presentes letres, Je, Jahen de Nanteuil, salu en notre Seignor. Je fat a savoir a toz que, comme Jahen de Laigni, orfevre, borjois de Paris, ait donné en almosne a l'église et as nonnains de Porreis, de l'Ordre de Cistiax, du dyocese de Paris, un pressoer assis joste Meudon, qui est apelé « le pressoer le Conte, ou de Contignies » et V arpenz de vignes en une piece et LX sols de menu cens, et III droitures et demie, apartenant en partie au devant dit pressoer ; les quex choses muerent en partie de mon fié ; je, tant comme a moi apartient, veil et otroi que les devant dites nonnains de Porreis tiegnent les devant dites choses et poesient quitement et perdurablement en main morte, sanz nule reclamance de moi ne de mes hers desore en avant. En tesmoig de la quel chose, je e baillé as devant dites nonnains ces lettres scellées de mon scel. Cest fet en l'en de Grace MCCLXVIII, en la vegile des apostres Saint Pere et Saint Pol.