Ego Johannes, castellanus Buneti Castri et dominus de Molignon, notum fieri tam posteris quam presentibus volo quod, pro remedio anime mee et uxoris mee Hersandis, dedi ecclesie sancte Marie de Sarnaio, in perpetuam elemosinam, omne nemus quod habebam apud Bollonel, quod nemus acquisiveram a Roberto, filio Simonis de Sancto Ferreolo. Dedi preterea dicte ecclesie de Vallibus quamdam peciam terre quam a predicto Roberto acquisiveram, viginti arpenta vel eo circa continentem, contiguam terris dicti loci de Bollonel, ex una parte, et ex altera, chemino quo itur de Auverneaux ad Sanctum Ferreolum. Hanc donationem voluit et concessit Symon, pater predicti Petri2, et Maria, neptis ejusdem Symonis, de cujus feodo dicte res erant : et eciam Haicia, uxor prenominati Roberti, et mater ejusdem, frater ejus Petrus et uxor fratris ejus Heremburgis, sorores nichilominus ipsius, Helisabet et Juliana hoc similiter laudaverunt et concesserunt. Quod etiam garantire fiduciaverunt Philipus de Ver, Radulfus de Valle, Willelmus de Ver, Hugo de Merrolis, milites. Si vero dicta domus de Vallibus aliquatenus super hoc vexaretur vel ab aliquo impediretur predicti Radulfus, Willelmus, Hugo captionem tenerent apud Montem-Leterici, infra quindenam in qua a monachis de Vallibus super hoc citarentur. Preterea jamdictus Symon, lausu Roberti filii sui, vendidit predicte domui de Vallibus terram quam habebat apud Lavarvillam ; quod fiduciaverunt garanciendum Robertus, filius sepedicti Symonis, et Petrus, frater Roberti ; et hoc ipsum Willelmus de Willervilla et Philippus de Ver garantire creantaverunt. Quod totum ut ratum et inviolabile sit, presens scriptum sigilli mei munimine roboravi. Actum anno gratie millesimo ducentesimo sexagesimo tercio, mense aprili1.