XL. Quex choses sont essoines, et comment l'en se doit essoiner.

§ 1.

D'essoines, et quex choses sont essoines. — L'en demande : se aucuns vient à son jor, et an ce li ponz rompe, et il ne puet trover navie, savoir se c'est esoines ? Et l'en dit que oïl.

Et se li ponz rompi ainçois que il poist trover passaige aillors, l'en demende se c'est essoines ? Et l'en dit que non.

Et se tempeste le prant antre voies, qui le tormente si qu'il ne puisse aler à son jor : c'est essoines.

Et se sa fame est morte, et de son fiz, et de sa fille, et de son frère ; et se fex art sa meson : c'est essoines ; se li forfez dure ou tens de l'alie ; car il doit sa meson escorre.

§ 2.

S'il est pris de guerre, s'il est de contanz hors de trives, et il n'i ose aler por le péril de ses ennemis : cex choses sont essoines d'aler en commune besoigne por le commun profit prise de seignor.

Unes autres essoines sunt por quoi hom ne se doit pas combatre, mès il doit metre deffendeor por soi : comme se aucuns n'a que un pié et une main, ou ait aucun membre perdu, par quoi hons ait perdu de sa vertu : maladie aparissant et non aparissant ; et cele qui n'est pas aparissant doit estre provée par trois tesmoinz, et par serement, de voir et de savoir. Et totes ces choses sunt essoines en aucuns quas ; et en aucuns cas nule essoine n'est receue, s'ele n'est aparissant.