Li prevoz esgarde an totes menieres que la cause d’aucun ne pire par autrui fet quant il antant que la fin de la cause est plus dure por autre aversaire que l’en amoine contre nos. Et por ce fu esgardé que se aucuns met le plet sor autre aversaire, et le fet esciant por nos conchier, nos avons contre lui aucion de fet, d’autretant comme ne nos vosison que il eust amené autre aversere contre nos. {1} Et s’il amoine contre nos home d’autre terre ou plus poissant que lui, il sera tenuz à nos de l’aucion escrite desus.

Ou s’il amene autre aversere por nos travaller.

Et se je pledoie contre lui qui est d’autre province, je doi pledier la où il est, en nos ne poons pas estre paronz à poissanz plus que nos. ¶ {1} Et se nos demandon un serf et il le franchit, et nostre afere en enpire por ce que li prevoz soutienent les franchises. ¶ {2} Et s’il met en autrui mein le leu où tu fes ta besoinge, an qui tu avoies auction et deffense que nul n’i feist ne n’i amenast eau, nostre afere en enpire ; car se la pledoiast à toi, tu otases cele ovre à tes despans. Et quant il me convient ore pledoier o autre que o celui qui cel evre avoit fete, je sui tenu et forcié d’oster à mes despens cele ovre ; car qui tient fet d’autre est tenuz par ces demandes que il sofre cele ovre estre otee. ¶ {3} Et se je te nonce nove ovre que tu fes en ma chose que tu n’i faces plus et tu mez celui leu en autrui main et li heritier fet iqui l’oivre, tu es tenuz à moi de cest jugement ; ausi comme je ne puisse pas pledier à toi de ce que tu n’en as riens fet, ne à celui ne puis je pledoier à qui tu l’as baillié por ce que ne li deffendi pas que il n’i feist rien. ¶ {4} Et de ce apert il que li prevost promet [35vB] que il retablira celui qui issi est atornez, que li autor a itel auction par l’ofice au juge por tant comme il ne vosist que cil eust quis contre lui autre aversere ‹...› il le li tendra. ¶ {5} Et se cil contre qui l’en a tele aucion est prez de sofrir tel jugement ausit com s’il tenist la chose, l’en ne le doit pas oïr ne doner li auction.

Encore, se cil à qui la chose est balliee de mon aversere a tant tenu les que l’en ne la li puet demander, cest ban est contre lui. {1} Et il puet avenir que aucun lesse à tenir la chose que je demande sainz tricherie, mes il le fet por foïr le plet ; et moulz autres choses puet aucun lessier à tenir sanz tricherie, ne no fet pas pour foïr le plet, ne n’est pas tenuz de foïr ce ban, car il ne met pas la chose hors de sa main que ne fet sanz plus que la chose lesser. Ne li prevost ne blasme pas celui quar il motre que il ne voloit pas avoir la chose, et il a bone pensee que il n’a cure de plet, ne l’en ne l’en doit pas blasmer. Mes cil doit estre blasmz que quant il vost avoir la chose la porte à autrui por deffendre, que il est plus animos et plus forz. ¶ {2} Pedius dit que ci ban n’apartien pas solement à müer la seignorie de la chose don est li plez, mes ausi se l’en mue la sesine ; se que non, il ne sera pas tenuz contre celui à qui l’en demandoit s’i lesse la possession. ¶ {3} Et se aucun met son plet sor autre por febleté ou por aage ou por ce que il n’i puet entendre, il n’est pas tenuz de ce ban, car ce ban fet mencion de male tricherie ; ne il ne porra pledoier par procurators por ce que il avront prise sor aus la seignorie aucunne foiz por droite cause. ¶ {4} Et cil ban apartient à droitures des teneures, que l’en ne la mete en autrui main par tricherie. ¶ {5} Cete aucion aviant à ce que cil vosit por tant que cil n’eust sa chose, ou se cil est morz à qui l’autre li balla, cest ban faut an ce, si li autor n’i a autre chose. [36rA] ¶ {6} Ceste aucion n’en porte point de poine, mes el commande que l’en n’enpeichast sa chose ; et ele est donee à l’oir et contre l’oir.

Uns chevalers demandoit possessions que il disoit que l’an li avoit donees ; l’an respondi que se cil don fust fet por acheson de müer le jugement, il convient que le premier seignor an pledoit ; que l’en ne croie que l’en ait baillié au chevaler plus la chose que le plet.