XX. De servise de vile1.

§ 1.

Les aucions des servises de vile et de citez sunt à cex qui les teneures sont. Li cemetire ne sont mie de nostre seignorie ; mès nos i poon chalongier la voie à aler an cementire.

Aucion de servise de vile aviant à nos, à l'esemple de celes qui apartienent à husage et à fruiz, que de reconnoissance, que de niance.

La reconnoissance avient au seignor qui le nie2.

Ceste aucion reconnoissance ne viant à nuli que au seignor de la teneure  ; ne nus ne puet chalongier servise, fors cil qui a sa voie en la teneure voisine, o qui il dit qu'il a servise.

L'en dit que servise de lo méen et fruiz est lessié, doit siure i tos los de la teneure : par on (par où) cil l'establi que i ostroièret l'usage et le fruit ; quar l'en ne doit pas voier qui est ostroié au fruitier par grâce de prandre les fruiz, ce n'est pas servise  ; quar servise ne peust estre deu au fruitier solement ; mès s'il est deu à la teneure, li fruitiers an usera3.

§ 2.

Anprès l'en dit que li fruitiers doit user de deffendre voie, se l'an an a usé ceste année : allors de droit, si comme en aucion de reconnoissance ; allors de fet, si come en ceste deffense ; et issit le dient li sage. Car se cil qui fist le testamant en hussa, l'en doit au fruitier doner bone deffense, ausint comme ces deffenses avienent à l'oir, ou à l'achateor. Et s'il achate une partie, ausint en doit l'en dire4.

Li cors dou leu n'est pas au seignor à qui est donez le servise ; mès il i a son droit d'i alier. Cil qui (a) aler sanz mener, ou mener sanz aler, aura aucion de servise5.

Se aucun a usé d'aucun usage, il retient sa droiture comme sésine, comme si l'avoit gaignée por voir mestre. Il n'est pas mestier qu'il die par quel droit li an establie, ou par lès ou par autre menière ; mès il [p. 145] a bone aucion qu'il monstre par aans que il a heu celui usage, ne qu'il ne l'a eu ne por force, ne an respost, ne par prière. L'en porra avoir ceste aucion, non pas solement contre celui en qui champ l'eue sort, ou par qui teneure el est menée, qui à toz porra plédier de ce, si destorbe le cors de l'eue, à l'esemplère de autres servises. Et généremant, quiconques empêchera le cors de l'eue, l'en porra avoir contre lui ceste aucion6.

Le conduit par qui je moine eue est commune voie, et ce conduiz rumpent et lèvent ta paroi, je cuit que tu puez bien plédoier à moi, que l'eue ne puet pas, ne ne doit venir de la moe chose en ta paroi. Se aucune iau n'apert pas, l'en n'i puet fere doiz ; et je cuit que c'est faus, car l'en puet ostroier à quérir eue ; et se l'en l'ostroie, l'en li puet mener et fere doiz7.