Ego Guido regie Francorum buticularius. Notum facio omnibus tam presentibus quam futuris, quod Hugo Lupus frater meus in ultima infirmitate sua, dum pressus gravi morbo reliquit seculum et ad religionem transiit, stallum in macello parisiensi domui Sancti Dyonisii de Monte-martyrum reliquit, me assentiente et confirmante, de cujus feodo predictum stallum erat, tali videlicet conditione, quod Reutia filia predicti Hugonis, neptis scilicet mea, omnes redditus qui de eodem stallo debentur in vita sua integre habebit, et post decessum predicte Reutie, prefata ecclesia de Monte-martyrum libere et quiete in perpetuum possidebit. Quod ut ratum et inconcussum permaneat, sigilli mei auctoritate confirmavi.