De escambio vinee de la Crote.

Omnibus presentes (sic) inspecturis, Officialis P., curie Parisiensis archidiaconi, salutem in Domino. Notum facimus quod, in nostra presencia constitutus, Milo de Nealfa, miles1, asseruit quod habebat et possidebat dimidium arpennum vinee site apud Stannum2, in territorio quod vocatur Mota, movens de hereditate et censiva ipsius, ut dicebat : quod dimidium arpentum vinee recognovit se dedisse et concessisse in escambium perpetuum religiosis viris abbati et conventui de Roscha, ordinis Sancti Victoris, pro duabus peciis vinearum sitarum, ut dicitur, ad Crotam de Marliaco3, in censiva, ut dicitur, heredum de Valle Orselli4, que fuerunt, ut dicitur, quondam nobilis mulieris Ysabellis de Ructoria5. Quas duas pecias vinearum predicta nobilis contulit in elemosinam, ut dicitur, abbati et conventui memoratis ; quas eciam pecias vinearum abbas predictus, in nostra presencia constitutus, monasterii sui utilitate pensata, recognovit se dedisse et concessisse nomine permutationis predicto Miloni et ejus heredibus in perpetuum, pro dimidio arpento vinee supradicto. Promittentes predicti Milo et abbas videlicet dictus abbas, in verbo sacerdotis, pro se et monasterio suo ; et dictus Milo, fide in manu nostra prestita corporali, quod contra permutationem hujusmodi per se vel per alium in futurum non venient ullo jure, et quod res predictas permutatas sibi ad invicem garantizabunt et liberabunt ; videlicet dictus Milo in manu mortua, sine coactione vendendi, distrahendi seu extra manum suam ponendi ; et predictus abbas, ad usus et consuetudines Francie contra omnes. Predictus vero abbas, coram nobis confidens predictum dimidium arpentum vinee esse in sex denariis capitalis census oneratum, promisit, suo et sui monasterii nomine, se redditurum predictos sex denarios censuales predicto Miloni et ejus heredibus in festo sancti Dyonisii singulis annis in futurum. Datum anno Domini Mº CCº quadragesimo nono, mense marcio.