II. De la loi Aquiliene qui parole d’omecide [rubr.]

La loi Aquiline abati totes les lois qui avant le parlerent de domage et d’injure. {1} Et ceste loi est au pueple et Aquilinus, uns metres, la fist.

L’en garde en la loi Aquiliene au premer chief que qui ocira à tort serf ou serve estrange, beste à .iiii. piez ou à .ii., il sera tenuz de randre autant comme ele valoit ou valut en cel an. {1} Et por le barat done l’en caucion au doble contre celui qui nie. ¶ {2} Et ausint comme il est aparissant que nos sers vait ivé à bestes, les betes à .iiii. piez qui ne sont pas en numbre des autres, ausint comme oilles, chievres, bues, chevaux, mulez, anes. Et l’en demande se crines sont contenues en non de bestes. Et Labeo dit que oïl. Mes chien n’i est pas contenu, ne autres bestes assez, si comme hors, lions, penteres, olifanz, chameaux ; et sont ausint comme mellez, car il servent ausint comme jumanz, et lor nature est cruelex, et por ce sont il au prim chief.

Se serf ou serve est ocis à tort, ceste loi a leu. Et ce mot i est bien mis à droit, qui a non injure, quar il ne sofist pas estre ocis, mes il convient que il soit fet à tort.

Et se je ocis ton serf qui me gaite, ceste loi a son leu et je sui segur, car naturel reson ostroie bien que l’en se deffende contre peril. ¶ {1} La loi ostroie que l’en ocie larron qui est pris de nuiz, mes que l’en lieve le cri ; et s’il est pris aucunne foiz, bien le puet l’en ocirre s’il se deffant de loing, ne mes que il crit.

Et se tu ocis aucun qui t’asaut o arme amolue, il est aparissant que ce n’est pas injure ; ne n’est pas aparissant que il l’eit ocis par injure. ¶ Et se aucun ocist larron par peor de mort [55rA], l’an ne dote pas que il ne soit tenuz de la loi Aquilieene. Et s’il l’ocist comme il poist aesement prendre, il li fet injure et il est tenuz de la loi Cornehene. ¶ {1} Il nos convient entendre injure en cest leu, ce que n’est mie fet por droit, c’est contre droit, c’est à dire se aucun aucist par sa cope un autre. Et par ce i avra l’en acune foiz .ii. aucions, l’une de la loi Aquiliene et l’autre de injures, et .ii. presentes, l’une de domage et l’autre de despit. ¶ Donques nos entendon injures domage qui est fet par cope de celui meismes qui ne bahet pas à fere domage. {2} Et por ce demandon nos, se desvé fet domage se l’en a contre lui auction de la loi Aquiliene. Et Pagasus dit que nenil. Quel cope – fet il – dut il avoir quant il estoit hors do sens ? Et c’est voir. Donques n’avra l’en contre lui point d’aucion ; ausi comme se beste fet domage, la loi Aquiliene n’a point de leu, ou se une tiel chiet d’en haut. ¶ Et ausit dit l’en se enfant fet domage. Et se cil qui n’a .xiiii. anz le fet, Labeo dit que il est tenuz de larrecin et de la loi Aquiliene ; et c’est voir, s’il siet ja que il ce fet. ¶ {3} Et se li mestres fet ploie à son deciple en aprenant, ou le tue, l’an demande s’il est tenuz de la loi Aquiliene comme cil qui a fet à tort domage. Julianus dit que oïl, mouvesmant qui crieve l’oil à son aprantiz en aprenant lou ; et molt est plus grief quant il l’ocist. Et met l’en ci avant un tiel essemple : ¶ un surré feri un garçon que il aprenoit par ce que il ne fesoit pas bien ce que il li avoit monstré, si belement que il li tret l’oil. ¶ Julien dit que il n’i aviant pas aucion de injures, car il ne le fist pas par acheson de injure, mes por lui enseigner et por lui amonestier ; ou se l’e‹n› a aucion de loange, il an dote, car l’en a ostroié à celui qui anseigne legier chastiement ; mes je ne dote pas que il ne soit tenuz de la loi Aquiliene.

Quant li mestres est trop cruex, il est copables.

Quel aucion avra li peres au garçon contre lui par que il pert la besoigne son fiz por l’uil que il a perdu et les despens que il a fet en lui garir ? ¶ {1} Nos de[55rB]von entendre ocis o glaive ou o fust ou à lance ou o mains, s’il l’estrangle par avainture, ou s’il le feri ou le pié an la teste ou en queque meniere. ¶ {2} Se aucuns est plus chergiez que il ne dut et gite son fes et tue le serf, la loi Aquiliene a leu, car il fust en sa volenté que il ne se chargast pas issint. ¶ Et se aucun tue aucun por son fes, Pegasus dit que ceste loi est contre lui en tel meniere s’il se trossa plus que il ne dut ou s’il chei par sa negligence qui ala par tel leu folement. {3} Et por ce, se aucun fet domage par la pointe d’autre, Proculus dit que qui l’enpoint n’en n’est pas tenuz car il ne l’ocist mie, ne cil qui fut botez car il ne fist pas domage par injure ; mes l’en avra aucion de fet contre celui qui le bota. ¶ {4} Se aucun ocist un autre en loistant ou an combatant an commun estrif, ceste aucion n’a point de leu, car il le fet por achoison de gloire et de vertu, non pas por injure. N’est pas autel an serf, car il n’est pas champion ; se l’en fiert le fiz au seignor an fuiant, ceste aucion avra leu ; ou s’il tue mon serf en estrif, ceste aucion n’a point de leu se li sires le commande. {5} Et aucuns fiert belement un serf malade et il an muert, Labeo dit que il est tenuz de la loi Aquiliene, car l’une chose seust fere mal à l’autre. ¶ {6} Celsus dit que il a mout grant difference s’i l’ocist ou s’il fust cause par quoi il morist, car cil qui en fu escheson n’est pas tenuz de la loi Aquiliene, mes l’en a contre lui aucion en fet, don il met essample de celui qui dona venin por medecine – cil fu acheson de mort –, ausint comme cil qui baille costel à celi qui est hors dou seu – et l’en a contre tel aucion en fet. ¶ {7} Et se aucun geta un autre dou pont en l’eau, Celsus dit : s’il perist par cet giet ou de maintenant est neez ou est vaincu par la force de l’eau, il est tenuz de ceste loi, ausint comme se aucuns eust feru un enfant contre une chose. ¶ {8} Proculus dit : se li mire trenche lo serf nicement, l’en a contre lui aucion de loage et de la loi Aquiliene.

Car jeu qui nuit est copables.

Cumme aucun [55vA] joassent à la pelote, aucun geta d’ahir an la mein au barbeor et por ce copa la gole à celi que il raet et chei le rasoir ; l’en demande qui en est copable. Proculus dit que il est tenuz de cete loi et que1 le barber en a cope. Et s’il raet la où l’en joet par costume, la où il passoit moult de gent, bien si gart le barbier ; ne ce n’est mie mau dit, se cil s’asist an leu perilos sor la sele au berbier, il ne se doit pleindre2 de nul que de soi. {1} Se l’un le tint et li autres l’ocist, il fust acheson de sa mort, et a l’en contre lui aucion en fet. {2} Et se plusors fierent le serf, l’en demande se toz sont tenuz ausi comme s’il l’ocesseissent. Or agardon, s’il est aparissant par qui cop il muert, cil en est tenuz, ausi comme s’il eust ocis ; et s’il n’est aparissant le quel l’a fet, tuit en sont tenu, ausint comme s’il tuit le ussent ocis ; ou se l’est enpledié ou un, li autre ne sont pas delivré, car en ceste loi Aquiliene le fet à l’un n’alege pas l’autre. ¶ {3} Celsus dit : se li uns fet ploe mortel et li autres l’ocist anprés, li premers n’est pas tenuz fors de la ploie, mes li darreniers est tenuz por ce que il l’a ocis ; et à ce s’acorde Marcellus. ¶ {4} Se plusors abatent un tref et tuent un home, li ancien s’acordent que tuit sont tenu de cete loi ; {5} et encor de celui qui ataina le chien et fist tant que il mordi aucun, tot ne tenist il lo chien, si comme dit Proculus, il est tenuz de ceste loi s’il tint le chien. Et s’il fist que il morde aucun et s’il le tint, l’en a contre lui aucion de fet. {6} Et l’aucion de ceste loi avient au seignor. {7} Se l’en fet h‹o›nte et domage an celui home que je te devoie randre, Julien dit que je doi avoir aucion de ceste loi ; ne quant je comoincerai à rendre le toi, je n’on te retabliré pas. ¶ {8} Et se li sires siert à aucun en bone foi, l’en demande se l’aucion de ceste loi li avient. L’en dit que il li avient plus aucion de fet. ¶ {9} Julien dit que cil à qui l’en presta robes, s’il sont depeciez, il n’avra aucion de ceste loi, mes ele avient au seignor. ¶ {10} Julien trete savo[55vB]ir se fruitier et usagier ont aucion de ceste loi ; et je cuit plus que l’en lor doit doner profitable jugement par cete cause.

Et si li sires de la proprieté fet ploie ou serf et l’ocist et j’é an celui usage, j’é contre lui aucion de ceste loi por la partie de mon usage ; et sera prisiez li tens que il n’avoit pas acompli.

Est plus aperte chose en home qui est plaié ; car s’il reconoit qu’i li ait fet la ploie ‹...› ; et regarderon le tens où ele fu fete.

Et par ce, se cil n’est ocis et est morz, il ne doit pas estre tenuz au mort, tot l’eit il reconeu. ¶ {1} Se procurator ou tutor ou un autre reconoit avoir fet plaie à un autre, l’an doit doner contre aus bone aucion. ¶ {2} L’en doit noter que en ceste aucion qui est donee contre celui quil recoli, juiges i est donez non pas por juigier que por amer ; car l’en n’a que fere de juige quant la chose est reconeue.

Ausint comme cil qui est tret en plet reconoist que il a ocis et il est prez de randre l’esme et li averseres le prise trop.

Cil qui font fosses par prendre cers ou s’il les font en voies et aucunne chose i chiet par ce, et est par ce fet sordere, il sont tenu de ceste loi ; et s’i les font en autres leus où l’en les a acostumees à fere, il n’en sont pas tenuz. {1} Et ceste aucion doit estre donee par cause, c’est à savoir se cil qui chei en la fosse ne le sot, ne l’en ne li fist savoir, ne il ne si pot porvoier ; car il i a mote choses par quoi demande est ostee se cil puet achever le peril.

Un copeor quant il abati un rain de l’arbre si ocist un home ; il est tenuz s’i le gite en leu commun, ne il ne cria pas avant que il se gardast. Nuncius dit que se ce avint en leu privé, l’en a aucion de cope ; et c’est bien cope que ce qui home qui bien se prant garde pot avant voer et il ne le fist pas, ou s’il cria lors quant l’en ne puet achever le peril. Et segont ceste [56rA] reson n’i a point de difference s’il chiet en leu privé ou en commun, car l’en vet sovent par privé leu. Et s’il n’i avoit point de voie, il doit solement jurer que il n’i fist tricherie, ne que il ne fist le rain cheïr sor celi qui vint passer, car il n’i a point de cope quant il ne pot deviner s’il i passeroit nule gent.

Cil qui fera l’escrit dou testamant ou autres qui ne puent estre leues, il est tenuz de aucion de chose baillie à garder, et à mostrer l’escrit, car il a rendue la chose corrumpue. Et ceste loi moismes est contre lui s’il a corrumpu ou effacé l’escrit.

Cil qui depiece autrui meson contre la volenté au seignor, et il fet bagn, encores3 estre le droit qui apartient au seignor de la terre, l’en a contre lui aucion de domage fet.

Aucion de cete loi avient au detor quant le detor fist ploie à la beste que il avoit promise avant le tens que il la dut randre ; et ausint est s’i l’ocist. Et se cil qui l’avoit promise la tue enprés la demore au prometeor, le dotor est delivrés, mes il n’avra pas en cest quas aucion de ceste loi, car li creancier fet plus tort à soi qu’autrui.

Se la feme fet domage en la chose, son mari l’en avra contre lui aucion de ceste loi.

Je te preste un cheval et quant tu et autres chevauchiez ensenble un de aus corust sor ton cheval et t’abati, et par ce quas le cheval ot les cuisses quassees. Labeo dit que l’en a contre toi nule aucion ; et se c’est avenu par la cope à celui qui estoit desus, je cuit, et c’est voir, que l’en doit avoir o le chevaucheor, non pas contre le seignor au chevau.

{1} Il n’est nul qui vit que li prevoz n’et ce establi moult à grant preu ; il apartient au commun, et à tot le mande, que l’en aille sanz peor et sanz peril par les voies. {2} Ne ne se monte rien se li leus par où l’en passe est privez ou commun, ne mes que l’en n’i et voie ; car l’en doit prendre [56rB] garde de cex qui vont la voie, non pas à cex qui vont les voies communes. Et cet leu par où li pueples vet devent estre segur. Et se li pueples n’alait pas aucune foiz par cele voie et lors geta l’en ou espandi l’en acune chose comme li leu fussent privé, lors i vet l’en, il ne doit pas estre tenuz de l’aucion de ceste loi. ¶ {3} Et se la chose estoit pandue en aut et ele cheist, chose est veüe que cele chose qui chaï est gitee ; car ce qu’est pandu s’i chiet est tenu por geté. Et s’il pent et il chiet, tot ne l’espande nului, l’en dit que cest ban doit avoir leu. {4} Et ceste aucion en fet est donee contre celui qui maint en la meson quant l’en gite ou quant l’en apant aucune chose, non pas contre le seignor de la meson, et la colpe en remaint à celui ; ne n’i a mester aucion au doble, ja soit ce que il soit tenuz de domage et de l’injure. ¶ {9} Nos dison que aucun habite en sa meson ou en aloee ou en prestee, li otes n’est pas tenuz, car il n’abite iqui il n’i demore que un poi ; mes cil i est tenuz qui habite l’ostel. Et il a autent de difference entre habiteor et hoste comme il a an antre celui qui a meson et celui qui point n’en a. ¶ {10} Se plusors habitent en une meson don l’en a gité aucunne chose orde, l’en avra aucion contre chascun.

Car l’en ne puet pas bien savoir qui a gité ou espandu l’ordure sor le trespassement.

Et chascun est tenuz por le tot ; mes se un l’a fet, li autre sont delivré.

Et il poient partie dou domage por la compoignie par ce que il le commanderent par juigement de compaignie ou par droite aucion.

Quant l’en fet honte au cors de franc home par aucunne chose que l’en a getee ou espandue sor lui, s’il est bleciez, li juige aconte le costement que il met as mires et ces autres despans que il fait por soi guarir ; et ausint les desparez [56vA] que il a fet por ses besoignes et qu’i li demorrunt por ce que li hons est meheiguiez. Et l’en ne fet nul esme de sor son cors, car l’en ne puet esmer franc home.

L’en apele aucions de forfet qui sont fetes contre nos, non pas marchié, qui de forfet et malefice de noz sers. Et li droiz et li poers de cex aucions si est tex que se nos somes par ce condempnz, il nos loist à baillier le cors à celui qui fist le domage4 ou rendre la value de la chose.

Se li sers oucist aucun par le seu au seignor, il oblige le seignor por le tot. Il est aparissant que li sires ait ocis celui, et se li sires ne le sot, l’aucion est de forfet. Mes il ne puet en plus estre tenuz dou maufet au serf que li doner por le forfet.

En totes aucions de forfet, la où l’en requiert que li sires le sache, doit l’en issi atendre se li sires puet deffendre au serf que il ne feist la folie et ne deffandi mie ; car autre chose est de doner autorité au serf de fere folie et autre chose est de sofrir li à fere la.

Qui pledie de plusors forfez en divers tens, il a sentence d’un des forfez contre le seignor, il n’a plus nule aucion contre le seignor, car tele aucion suit5 le chief ; ou se li sires vost plus en premier plet sofrir l’ame dou plet6, il est tenuz à l’un ou à l’autre s’il pledoie dou malefice.

À totes les foiz que li sires est trez en plet de cause de forfet, il ne veaust oïr droit, li aferes est en tel quas qui doit doner celui qui fist le forfet por quel forfet en quel non il prist le plet sus soi ; ou s’il ne le fet, il doit prandre toz les faiz sor soi. Mes il ne sera pas condempnez s’il n’a le serf en son poer ou s’il fet por quoi il ne li ost pas.

Nus ne est forciez de dire de deffandre autre en plet de forfet ; mes il ne doit pas avoir celui qui le deffant si l’est [56vB] seirs. Et se cil qui est am poer est franc, il moismes se doit deffandre.

Se filz qui n’est pas en bail est condempnz de chose qui n’est pas juigie, la condempnacion tient. Et encores doit l’en dire que li peres puet estre trez en plet solement enprés la condempnacion ou filz.

Li serf devent estre deffendu la où il firent le forfet ; et li sires doit trere avant le sers la où il font force ; et je doi perdre la seignorie de toz se je ne les deffant.