VI. De partir chose commune [rubr.]

Juigement de departir communauté est por ce necessere, par ce que aucion de compaignon apartient plus aucune foiz à pres‹t›ories de genz que à parties des communes choses. Cest juigement ne tient pas se la chose n’est commune.

Ne nuit rien se chose est commune ou à compoignie, car en l’un cas et en l’autre a leu cestui juigement quant la chose est commune par compoignie. Ausi entre aus que achaterent la chose ensenble, la chose est commune, si comme à cex à qui la chose est lessie en testamant. ¶ {1} L’en demande qui est autor en ces trois juigemanz qui font departir choses entre mesnie, et de communauté, et de metre bones; car la cause est yvel de toz, mes acordé est que cil soit autor qui primes mut le plet.

En departir chose de commune ne vient rien entre la devise des choses qui sunt communes, et se l’en fet domage et se aucuns des compaignons i a domage ou il i a gaignié de la chose commune. ¶ {1} S’il font entre aus aucunne chose par tricherie, li juiges doit regarder premieremant en fere partie entre mesnies et en departir communauté.

Par ces juigemanz fet l’en grandes choses corporex don nos avons la seignorie non pas de l’eritage. ¶ {1} L’en demande depuis se [58rA] l’en puet departir la communauté. Et l’en me dit que oïl se la terre est commune. ¶ {2} Cest juigement est de bone foi par quoi se une chose qui n’est pas devisee est lessie, ele vendra en la partie de ces autres choses et porra l’en pledoier de cest juigement et de la chose qui ne fu mie partie. ¶ {3} Autresi comme la devise de la chose vient en cest juigement, ausi i vienent ce que l’en rant ; et par ce, se aucuns fet despens, il les avra, et s’il ne plede à son compoignon mes à son heir. Labeo dit que les despans et li fruit i deivent venir, et moismement li fruit qui furent avant pris que la chose fust commune, ou les despans qui avant furent fet ne vienent pas en partie. {4} Et par ce dit Julien : se nos somes mis en possession et nos i avon domage, et je i faz une borde avant que l’en nos ait commandé à avoir la possession, je ne puis pas demander ces despens par ce juigement.

Nos devons estre receuz que se cil qui convient rendre aucunne chose de commun anprés ce que la commune chose est gastee en vieust pledoier, il avra droite cause par ce juigement ; ausi comme se li autor a fet aucuns despens en la commune chose, ou se li compoignz a gaagnié aucunne chose de cele chose, ausint comme s’il en a eu les besoignes au serf ou le loier, reson de tot sera iue par ce juigement.

Se ‹est› mesons communes, ou parroi commune, et mestier est que l’en la reface, ou que l’en l’abate, ou que l’en i mete aucunne chose, l’en pledera par ceste cause par juigement de porsement.

En cest juigement vienent totes les choses, se aucunne chose n’en est novicement mise hors par commun acort.

Arbitres ne puet establir que champ heritier ne serve à champ qui n’est pas heritier ; car outre ce qui demene en plet ne puet li juiges fere plus.

Li arbres qui est nez [58rB] en la bone et la pierre qui est nee et s’estant à l’un champ et à l’autre, sont commun à .ii. seignors de .ii. chans, ne ne vienent pas en partie de juigement. Mes quant la pierre est ostee ou li arbres arachiez qui est commun, il sera ausi comme sanz partie, et vendra en cet plet ; car ce qui estoit en la fin des parties est mellé en celes. Et par ce, se tote une masse d’argent qui est commune à .ii. seignors est mise ensenble à la forge et ou feu, se aucunne chose se remaint sevree de la premiere masse, ele a la seignorie, come l’arbre et les pierres qui sont tretes hors dou champ meslent le droit de la seignorie. ¶ {1} De galerie de .ii. mesons qui est commune dont l’en veust estre arbitres de departir la communauté, cil arbitre n’en puet estre pris se les parties ne s’i acordent ; car cil qui convient bargignier de la galerie, convient que il face marchié de totes les mesons, s’il n’i puet avoir s’antree en autre meniere. ¶ {2} Se une voie nos est donee par un moismes leu et nos avon fet aucun despens en cele voie, Pomponius dit que droite chose seroit de avoir de celui aucion de ce juigement ou de compoignie, car quel communauté puet l’en entendre deviseement par soi ainz doit de ce avoir aucion des aferes fez. ¶ {3} Li juiges en cest juigement et en celui de mesnie qui voloit departir doit demander de serf qui est furtif qui bargigne entre aus qui l'avra et que il remoinge à celui qui l’avra bargignié; n’en n’i avra lors point de peril ne de senator ne d’autre loi. ¶ {4} Voie desvee ne vient pas en cest juigemant, et ce dit Labeo, car il est dou champ moismes ; et por ce ne vient ele pas en cest jugement, ou il est devisé de la teneure ou par mesure ou par autre chose. Et se puet l’en aucunne foiz deviser les droitures, et puent estre hors dou champ, ne n’est devisee ne par mesures ne par autres choses [58vA], ausi comme cil à qui li chans estoit, il lessa plusors hers ; et quant ce avient, acordee chose est que ce viegne en partie entre mesnie, ne ne puet l’en voer ce dit Pomponius, por quoi ce viegne plus que en partie. Donques en cest juigement vient ice et autres choses que li droit soient departiz ou par mesure ou par termines.

Se je edefice une paroi en mon non et en non de mon voisin et je li demant les despens por sa partie, bien le puis fere se je ne li done ma part des despens.

Il convient à juge fere ce qu’est preu à parties et ce que cil qui pledoient volent en chans departir.

En chose commune nul des seignors ne puent riens fere contre la volenté à l’autre ; donc il est aperte chose que deffendre est seignorie, et en chose communel est meillor la cause à celui qui deffent. Et sis compoignon deffent à son compaignon que il ne face rien en la chose commune, il ne le puet pas forcier à oster l’ovre que il a fete s’il lesse à defandre li quant il le doit deffendre, et par ce juigemant porra il avoir son domage. Et s’il consant quant il fet la besoigne, il ne puet avoir aucion por le domage. Et s’il fist aucunne chose sanz le sen son compaingnon, en son domage, il est tenuz de oster le.

Ceste aucion est moult necessere, et est en usage chescun jor, et fut amenee avant mesmement por chalonges.

Mostrer est baller à son aversere, qu’i est autor de transcrit de ses letres, que il en puisse pledier s’il veust.

En ceste aucion doit li autors connaitre1 ses estrumanz et dire les monstrances de la chose dom est li plez. ¶ {1} Cil qui pledoie de ceste aucion ne se apele pas seignor, ne le doit mie monstrer, car il i a mout causes de fere monstree. ¶ {2} Encore doit l’en noter en ceste aucion que reus qui ne veust venir à jor pot2 estre condemné en plet par [58vB] le seremant au demandeor, et taxera li juiges la chose. ¶ {3} Ceste aucion est personel et avient à celui qui en veust pledier de cele aucion comme il vodra ou de gage ou de prest, ou de usage et de fruit. {4} Ce dit Papinien. {5} Et se aucun veust fere deffense et que l’en li mostre estrumant, il sera oïz. ¶ {6} Et se je demande serf ou aucunne autre chose donc li chois m’est lessiez, je puis demander la montree et puis chalongier le. ¶ {7} Se aucuns veust pledoier d’aucion de forfet, ceste aucion li est necessere. Et se3 sires est prez de demander le serf, et cil qui demande ne puet deviser la chose s’il ne l’avoit que il ne conoist pas le serf ne n’an set le non, donc n’est il droit que l’en li mostre la mesure por conoistre le serf qui fist le forfet ? Et ce convient il que l’en face à demostrer celui en qui non de forfet aucun pledoie et que li serf seent retenuz. ¶ {8} Se aucun veaust monstrer contre l’oir tables ou escriz ou aucunne chose autre qui apartient au testamant, l’en doit dire qu’i n’est pas mestier que il pledoit par cete aucion comme les deffanses que il fet de la chose li sofisent, si comme dit Ponponius. ¶ {9} L’en doit savoir que ceste aucion n’aviant pas solement à cex que nos avon dit desus mes à celui encores à qui il apartient que la chose soit monstree. Li juiges doit quenoistre tot de plain s’il apartient à celui, non pas se la chose est soe, et issi doit commander que l’en mostre les letres ou non. ¶ {10} Oncor dit plus Julien que, se je ne chaloinge de la chose, je puis demander qu’i soit monstree quar il m’apartient. Ausi comme se un serf m’est lessié que Tybert demandoit, je plederoi que il soit monsté, car il m’apartient que Tybert choississe, et issi le porroi chalengier, ja soit ce que je ne le puisse pas choisir quant il me sera monstré. ¶ {11} Se l’e‹n› pledoie o moi de ceste aucion, je n’en puis pas pledoier, tot soit il veu [59rA] que il ne li apartiegne, par ce que je sui tenuz à restablir la chose ; mes ce ne sofist mie, car cil qui fist par tricherie que il ne porsoit la chose porra pledoier de ceste aucion, tot ne chaloinge il, tot ne deffende il ; et larron et raviseor en porra pledoier, mes ce n’est pas voir. ¶ Neratius dit moult bien que li juges doit conoistre de la monstree, et doit voir s’il ont droite cause de ces de demande avoir. ¶ {12} Ponponius dit que plusors puent avoir aucion en non d’un home ou de une chose; se li hons ostroia que l’en eust en lui husage et li tierz dit que il i a sa possession et li quarz dit que il l’a en gages, donques puent tuit avoir ceste aucion, car à toz apartient que li hons soit mostré.

Se l’en pledoie à fere monstree o celui qui pas ne tenoit ne ne fist pas barat par quoi il ne tenist, enprés ce que cil est mort sis heirs tient cele chose, l’en le doit forcer à monstrer la ; car il s’il tient un champ ou un home et je le demande et li hers le demande par cele cause moismes, il est tenuz de monstrer le.

Et se li heritages est parduz por ce que li sers n’est monstré, droiz est que li domages de l’eritage soit esmé por l’ofice au juige. ¶ {1} Or devon voer en quel leu l’en doit fere la monstree et à qui despens. Labeo dit que l’en doit fere la monstree où li plez fut entamnez, au peril et au despens à celui qui demande. Et dit que il le doit pestre ¶ la où li plez est comoinciez, et vestir et garder s’il est malades. Et je di que il convient que cil qui demande sache ce, se li serf li soloent monstrer ses besoignes et son aingin, or est mené à ce que il ne fet rien. Et se cil qui devoit estre monstré i est amené au mestier, il i convient qu’i l’en li prove dou despens, meismes cil qui li demande s’il ne li avoit apris à doner à mangier ; et s’il avoit apris, ausi [59rB] comme il le pest comment que il le pesse. Et aucunne foiz convient que il mostre le serf en ice leu ou ses despens ; se tu diz, par avanture, se cil par son barat l’a repost en tel leu qu’i n’est pas bons à avoir ne profitables à celui qui demande ; car en cest cas doit il mostrer le au peril et à despens à celui en celi leu où est le plet, que son conchiemant ne li est mestier. ¶ {2} Se aucun est tret en plet de plusors choses et il tient totes ces choses au tens que li plez fu comoinciez, tot en lesse il à tenir aucunnes amprés ce sanz barat, il doit estre condempnez s’il ne mostre celes que il pot mostrer.

Se aucunne paie est fete et li gage sont delivré, le creancier est tenuz que il mostre l’estrumant que li detor li baille et qui apartienent au marchié, et de ce avra contre lui ceste aucion.

Tuit cil puent demander avoir la mostree à qui il apartient. Et aucun demande s’i porra tant fere que les4 resons que sis averseres a fussent mostrees, que il li convenoit moult qu’i fussent mostrees. Je di que ne convenoit pas fere tort au droit de cité de antreprandre les paroles de droit, mes il convenoit esgarder quele aucion l’en avroit contre lui ; car la reson si est tele que aucuns sages d’aucunne escience porroit dire je demant à mostrer celui livre ; et s’i li estoient monstrez, il en seroit plus acerteniez.

L’en plede de avoir la mostree por demander comment li serf ont fet por fere juigement contre lor sers compoignons.