Rieux. Maison près l'Eglise.

Nos Symon de Feulleuses miles et Domina Ada uxor, Notum facimus universis presentes litteras inspecturis quod nos pro remedio et salute animarum nostrarum et antecessorum nostrorum quitavimus in perpetuum et etiam quitamus viris religiosis et honestis..... Priori et monachis Ecclesie Sti Christofori in Halapia Cluniacensis ordinis, Belvacensis diecesis, quidquid juris habebamus vel habere poteramus quoquomodo in quadam domo eorum sita apud Rieu juxta Ecclesiam ejusdem loci cum omnibus appenditiis ejusdem domus excepta quadam mina avene quam habemus in eadem et duodecim denariis ex annuo reditu singulis annis in festo beati Dionysii et uno quarterio vini singulis annis in vindemiis nobis et participibus nostris in eadem domo retinemus volentes et concedentes quod dicti Prior et monachi domum predictam cum appenditiis de cetero in manu mortua teneant et quiete possideant in perpetuum ut dictum est, mediantibus triginta libris turon. nobis à dictis Priore et monachis in pecunia numerata persolutis, exceptioni non numerate et non solute pecunie et omni juris auxilio tam canonici quam civilis renuntiantes, promittentes fide a nobis prestita corporali quod in predictis domo seu appenditiis ejusdem nichil de cetero exceptis predictis per nos vel per alios ratione alicujus juris reclamabimus vel reclamari faciemus ; et specialiter ego, dicta Domina Ada ratione dotis sive donationis propter nuptias vel alterius cujuscumque juris omnibus predictis ut predictum est penitus et expresse renuntio spontanea voluntate mea, in nullo coacta fide mea prestita corporaliter. Promittimus etiam sub eadem fide quod predictam domum cum appenditiis ejusdem modo prescripto quictatam dictis Priori et monachis erga consortes et participes nostros legitime garantizabimus et deliberabimus et ad hec omnia et singula firmiter observanda heredes nostros specialiter obligamus. In cujus rei testimonium presentes litteras priori et monachis tradidimus sigillorum nostrorum munimine roboratas.

Datum anno Domini ducentesimo quinquagesimo quinto, die Jovis post pascha, prima die Aprilis.