Maison à Rieux.

Universis presentes litteras inspecturis magister Simon de Villaribus, quondam filius defuncti Guiardi dicti de Bituris, armigeri, salutem in Domino. Noveritis quod nos, voluntate spontanea, non coacta, non vi seu dolo inducti, immo certa scientia imperpetuum quittavimus coram discreto viro Egidio, dicto de Courciaux, Baillivo Silvanect. in plena assisia apud et in presentia militum ibidem assistentium et etiam quitamus Religiosis viris priori Sti Christofori de Halata et ejusdem prioratus monachis, Cluniacensis ordinis, Belvacensis diœcesis, et eorum Ecclesie omne jus, dominium, proprietatem et omnem actionem realem et personalem, utilem et directam quod et quam habebamus et habere poteramus et debebamus in quadam domo sita apud Riu, juxta ecclesiam de Riu, cum horto et appenditiis ejusdem domus quacumque ratione existat, exceptis redditibus inferius nominatis, videlicet una mina avene et duodecim denariis reddendis in festo beati Dionysii, et uno quarterio vini in vindemiis tantum modo, volentes et concedentes quod Prior et monachi predicti, dictam domum cum ejus appenditiis in manu mortua quiete et libere ac pacifice in perpetuum teneant et possideant et ad hoc omnia et singula firmiter et imperpetuum observanda, nos et heredes et nostros et omnia bona nostra presentia et futura, mobilia et immobilia, acquisita et acquirenda ubicumque existentia iisdem obligamus et promittimus bona fide quod contra quitationem hujusmodi quoquo jure de cetero nullatenus veniemus. Immo, eisdem religiosis domum ipsam cum ejus appenditiis garendizabimus et defendemus in judicium contra omnes. In quorum premissorum testimonium et munimen ac perpetuam memoriam, sigillum nostrum presentibus litteris duximus apponendum.

Datum anno Domini M^o CC^o septuagesimo sexto, die Veneris ante Nativitatem beate Marie Virginis.