Dixme de Saint-Pierre de Pompoing.

Omnibus hec visuris G. Decanus et capitulum Belvacense salutem in Domino. Notum facimus quod cum controversia verteretur inter nos Decanum et Capitulum Belvacense ex una parte, et Priorem Sti Christofori in Halata super quibusdam decimis quarumdam terrarum sitarum in parrochia Sti Petri de Pomponio et in confiniis dicte Parrochie seu in territorio dicte ville et locis circum adjacentibus, quas decimas nos decanus et capitulum dicebamus ad nos pertinere et non esse et fuisse in possessione vel quasi percipiendi dictas decimas et habendi, dicto Priore in contrarium asserente, tandem de bonorum consilio et pro bono pacis, composuimus nos predicti decanus et capitulum et Prior prelibatus habens potestatem et mandatum speciale compromittendi a venerabili Patre suo, Priore de Caritate cui immediate subjectus est, in arbitros arbitratores seu amicabiles compositores, scilicet in venerabilem virum et discretum Gh. archidiaconum suessionensem a nobis Decano et capitulo electum, et in religiosum virum Stephanum, Priorem Sti Lupi d'Esserens a dicto Priore de Halata electum, qui arbitri predicti onus compromissi predicti in se susceperunt, volentes et concedentes quod duo dicti arbitri arbitratores seu amicabiles compositores de plano jure et sine strepitu judicii diebus feriatis et non feriatis, partibus presentibus vel absentibus, vocatis tamen, de dicta causa sive discordia possint cognoscere et etiam pace vel judicio alto et basso sub sue libito voluntatis infra Assumptionem Beatee Marie Virginis instantem nisi de consensu partium terminent. Si vero in unam nequiverint sententiam concordare vel non fuerit processum in arbitrio usque ad definitivam sententiam infra terminum suprascriptum vel infra prorogationem si contigerit terminum prorogari, nos predicti decanus et capitulum ac etiam prior predictus de Halata, de communi consensu nostro eligimus virum venerabilem et discretum magistrum Nicolaum de Bestisiaco, archidiaconum minorem Caleti in Ecclesia Rothomagensi arbitrum arbitratorem seu amicabilem compositorem, cui dicti duo arbitri totum processum cum discordia, si discordia inter ipsas fuerit, tenebuntur tradere, et dictus magister Nicolaus cum dictis arbitris dictum negocium seu potius discordiam alto et basso pace vel judicio, pro sue libito voluntatis infra instans Natale Domini totaliter definire. Promittentes bona fide et sub pena centum librarum argenti parti observanti dictum arbitrium sive ordinationem a parte resiliente ab arbitrio reddendarum, nos inviolabiliter servaturos quidquid per dictos duos arbitros vel per tertium desuper electum cum dictis duobus arbitris super dicta discordia seu contentione dictum fuerit, arbitratum seu etiam ordinatum. Actum est etiam inter me Decanum et Capitulum et Priorem de Halata quod sententia lata et interdicta in quascumque personas sive loca ad instantiam partium sive de facto, sive de manibus arbitrorum de Jure pendente, arbitrio supra dicto relaxentur et quod res litigiose cum tota discordia durante, compromisso predicto sint et remaneant in manibus arbitrorum. In cujus rei testimonium presentibus litteris sigillum nostrum duximus apponendum.

Datum anno Domini m^occ^olxxvii^o die Jovis post Pascha.