§ 1.

Uns hons et sa feme ont trois enfanz, et en marièrent les deus ; enprès li pères et la mère morirent. Totes les remenances des choses mobles, et escheetes, et conquez, et patremoine, seront as derreniers enfanz, qui remaindrent sanz partie.

§ 2.

Une feme si ot trois enfanz de son seignor, deus fiz et une fille ; ses sires morit ; antre lui et sa fille, pristrent deus frères o tot ce que il avoent ; et furent tuit li enfant, et la mère et la fille, commun assemble [p. 256] douze anz, et conquistrent ; enprès se vodrent départir : l'en demende comment li conquest seront départi ? Et l'en dit que il en sera fet trois parz, car ce sont trois avoir ; dont la mère aura une des parties, et li troi enfant l'autre, et li dui frère l'autre.

§ 3.

Toz l'éritages à la mère qui a eu deus seignors, sont au premiers enfanz, que li fut doné au premier mari.

§ 4.

Et si n'i a parenz, fors de si loing que puichet fere mariage, ce ne tost pas escheete ; car qui fet dispensacion au mariage, il ne le fet pas en héritage.

§ 5.

Et se home conquiert, lui et sa feme, et muere, sa feme sera heir en la moitié, par la reson de la compoignie ; et des mobles ausint.

§ 6.

De héritage, il vendront au procheins parenz, sauf le doere. Et s'il i a enfanz de sa feme, li enfant prendront par le père ; et ausint vet de la partie à la mère.

Et se li enfant morent enprès, quant la chose lor sera escheete, sanz hoir de feme esposée : ce qui sera de par le père, sera as parenz procheins de par le père ; et ce qui sera de par la mère, sera au procheins de par la mère.

Et se la chose de par la mère mot de par la soe mère, et de par son père, et la chose eschée do fiz, qu'en fera l'en ? Et l'en dit que chascune porroiz prandre (prendra) por tant comme a (elle) devra, segont le nombre qui movra de la paroi, et issint en consigance. Et se un home a enfanz de sa première (feme) et a enfanz de la segonde, et de la tierce r'oit enfanz, et il ait héritage et conquez avant qu'il se mariast, et conquez en chescun mariage, et conquez an l'anez : vée, comment sera do départir ? Et l'en respont que l'éritage au père et à la mère, qui fut joinz ou premier mariage, et li conquez fez au premier mariage, sauf le testament au père et à la mère, tot sera as enfanz de celui mariage.

§ 7.

Et s'il i a mobles, li enfant auront le tierz, et le père le tierz.

§ 8.

Les conquez, les mobles do père et de la mère, et les eschoetes an la segonde nanée dou segont mariage, seront as segonz enfanz ; et issint en consinance à toz les mariages qui vendront enprès. Et ceste costume se cort dedanz la banliue d'Orliens, et en la cité.

§ 9.

Segont la costume de hors la banliue, la feme emportera première do patremoine à l'ome la moitié por son doere ; et ce sera patremoine [p. 257] as enfanz. La segonde feme aura en l'autre moitié le quart por son doere ; et celi quart sera patremoine as enfans do segont mariage. Le quart qui remoint sera communs à toz les enfanz, premers et dereniers.

§ 10.

Et conquez et escheete que li pères fet au segont mariage, et mobles, sont as enfanz do segont mariage, et les detes.

§ 11.

Et s'il i a conquez fez en la nanée, la segonde feme aura la moitié por son doere ; et sera patremoine as enfanz de celui mariage. Et ceste costume est hors de la banliue. Et l'autre moitié sera commune à premiers et darreners ; et issint en consiguance, as mariages qui en près vienent.

§ 12.

Toz li conquez et l'escheete que fame reçoit en son mariage, soit premiers, soit tierz, tot est as enfanz de celui mariage.

§ 13.

Et segont la costume de l'ostel le roi, quanquez la mère a en patremoine, en conquez, en escheetes, est commun à toz ses enfanz.

§ 14.

Escheete et avenue est contée, tantost com ele vient, par héritage ; conquez, non ; mès ausint comme mobles.

§ 15.

Nus ne pot prendre escheeste de père ne de mère, tant com li fiz i soit, nevoz, segonz nevoz ; ne tant comme en cele linie ait nus heirs.