XXV. D'escheete.
§ 1.
Achaete est dite de chaer, et vient de costé.
§ 2.
Riens ne pot escheer à bastart. A serf puet escheer de serf, et non de franc ; et convient qui soit sers à celui seignor.
§ 3.
Et d'estre condempnez par juigement ? Nus hom condempnez par juigement, tot soit-il fuitis, et ait feme, ne pot avoir heirs, ne fere.
§ 4.
Moilleré puet hériter, et desvé, et sort, et muz, et orp, et feme.
§ 5.
Deus devisons a en héritage : l'une est de fié, l'autre est de vilenage ; premièrement nos diron de vilenage, et puis enprès do fié.
§ 6.
L'en dit que li plus près prent l'escheete qui mot de la soie paroi. Or demende l'en se aucuns a parenz de deus paroiz, et il conquiert mobles et teneures, qu'en sera ? Et l'en dit que li plus près aura tot ; et s'il sont iuel de deus paroiz, iuéement prendront.
§ 7.
Femes et homes prenent iuéement en acheeste en vilenage.
§ 8.
[p. 258] Eschaeste vient à enfant conceu en ventre.
§ 9.
Se un home est apelez de un de granz crimes, et escheete li avient avent qu'il en soit condempnez, bien la pot recevoir ; et s'il est condempnez par juigement, il la pert par la costume aprovée de l'éritage.