V. De cex qui joent es tables [rubr.]

Li prevoz dit que se aucun bati celui ches qui l’en joe as tables ou se l’en li fet domage ou se aucunne chose en celui tens est ostee1 par son barat, je n’en feroi ja droit. ¶ Et ge prandroi garde quel chose ce sera ou cil fist force qui joeent as tables et qui i fist force por le jou. ¶ {1} Se li joeor s’entretolent, il avront aucion des biens toluz ; ne le receteor n’i puet riens chalongier, ne li joeor, car il ne sont pas digne. ¶ {2} Encor doit l’en noter que cil qui reçoit cex menesterex, s’il est batuz et s’il i a domage, il2 ne le vange. Et s’il en fet larrecin en sa meson endamentieres que l’en jue, tot ne le face le juor, il en est hors de poine. ¶ Nos devon entendre la meson et por leu et por habiter. ¶ {3} Ce que li prevoz nie que il ne donra pas aucion de larrecin en cest ban veon que c’est à savoir s’il apartient qu'i i est poine, ou se cil qui pert veust chalongier ou s’il veust que l’en li monstre la chose perdue ou s’il en veust pledier. Et Ponponius dit que en ceste aucion n’a point de poine. Et je ne cuit pas que ce soit voir, car li prevoz dit rondement : se l’en enble rien, je n’en donroi pas droit. {4} Et dit li prevoz : « je donroi juigement et verré pour quoi il fist force qu’i joet à tables ». ¶ Ceste cause apartient à celui qu’il a força à juer, que il soit mis en prison ou que il soit puniz en autre maniere.

Aucunne foiz solent les uns les autres forcier à joer co‹m› seent il voincuz. {1} Li senator deffendirent joer por deniers, fors que se aucuns a pris en atine à joer à la pelote, à corre et à saillir, à luitier ou à combatre por esprover sa vertu.

Si comme de cex choses où l’en puet fere promesses segont [62rB] la loi ; et as autres choses ne le puet l’en fere se ce n’est por soi esloser.

Ce que l’en joe par mestre en mangier de maintenant est bien sofrable. ¶ {1} Se serf ou fiz qui ne est pas encore hors de main jue et il pert, li sires ou li peres le puet demander la perte. Et se li serf prist l’argent, l’en donra contre le seignor aucion dou chetel non pas dou forfet, car le plet est de la chose que l’en a fete, mes l’en ne le doit plus mener à rendre que tant comme valoit le chetel de cele chose. ¶ {2} L’en a contre les paranz et contre les parçoners bone demande de ce que sont joie en jeu des tables.