IV. De partir les biens au detor [rubr.]

Ulpianus dit : l’en doit savoir que departemenz de biens seust estre enpetrez par le juigement au prevost. {1} Et il seust estre ostroié as creanciers ; si comme se Sey devoit à aucun et il morut, et Tyces fu sis heirs, ne Tyces n’a de quoi paier la dete, il convient que si bien soient vendu. [138vA] ¶ Li creancier Sey dient que li bien Sey lor sofisent bien, et li creancier Tyce que il se tienent apoié des biens Tyce. Et issi dient il que il convient fere .ii. ventes de .ii. manieres de biens ; car il poit bien avenir que Say avoit assez de quoi fere satisfacion à ses creanciers. Mes quant li creancier Tyce sont asenblié à els, il ne puet pas poier à toz, car Tyces n’a pas tant comme il doit. Il est donc droiz que li creancier Sey, qui requierent que li bien soient departi, soient oï, et enpetrent do prevost que chascuns des creanciers aient le chetel à lor detor. {2} Mes li creancier Tyce n’enpetreront pas le departement, car il loist bien à chescun à ampoirier sa condicion. Mes cil qui reçoit l’eritage à mon detor ne porra pas enpoirier ma condicion, car il me loist à demander departement des biens ; mes il charge ses creanciers quant il reçoit l’eritage qui n’a de quoi aquiter soi, car si creancier ne porront pas demander departement des biens. {3} L’en doit savoir que se li heirs oblige les choses de l’eritage par non de gage, cil qui enpetre le departement des choses à meillor cause que cil à qui eles sont obligees ; et issi l’escritrent Scevola et Antonius. {4} Departemenz des biens est empetrz encontre la borse et contre cex qui sont es garnisons. ¶ {5} L’en demande se li creancier à l’oir puent aucunne foiz enpetrer departement des biens, s’il a receu l’eritage por guer les. Mes en ce n’a nul remede1 ; ne il ne puent blasmer se ou non de cex qui firent marchié o cele ovre, se li prevoz ne le secort hors d’ordre contre la male bodie à l’oir ; mes ce n’est pas receu legierement. {7} Se aucuns est heirs son pere et il muert ainz que il ait .xiiii. anz, et li bien à celi qui fu establiz à estre heirs aprés lui sont vendu por ce que il reçut l’eritage au pere, et cele au fiz, veons se li creancier au pere puent enpetrer departement des biens ; et je croie que oïl bien. Et si croi que li creancier au fiz puent demander departement contre les creanciers à l’oir. ¶ {8} Veons selonc ce : se li primes ‹hoirs fet li segonz›, se li segonz hoirs fet li tieerz, et li bien au tiers sont vendu, li quel creancier puent enpetrer departement des biens ? Et je croi que li creancier, se li prime demandent, il doivent estre oïz contre toz les autres. ¶ Et se li creancier segont demandent contre les creancies tierz, i le puent enpetrer contre les creanciers premers ; et li premers les puent enpetrer contre toz les autres ; et li creancier segont ne les puent pas enpetrer contre les creanciers premers, mes il puent enpetrer contre les creanciers tierz. [138vB] {9} Se l’en vent les biens au fiz qui est en bail, que il a chetel et que i l’a conquis par chevalerie, ¶ veons se departemenz doit estre fez entre les creanciers à qui il doit por cele cause et les autres. ¶ Se aucuns firent marchié à lui ainz que il fust en chevalerie, li departemenz doit estre fez ; se li bien qui sont conquis par chevalerie sont donc vendu, li creancier que il ot avant ne puent pas partir o les autres. ¶ Se aucunne chose en fu mise ou besoing ou pere, l’en porra contredire le creancier qui bailla cele chose que il ne dement rien sor le chetel qui a esté conquis par chevalerie, car il en puet pledier au pere. {10} L’en doit savoir que li creancier puent demander departement qui firent convenance à l’oir, non par corage de renoveler la dete ; mes se il se sont tenu à lui par corage de renoveler la dete, il ont perdu le preu dou departement ; car il sont tenu à l’oir se il ne se puent puis partir de lui. ¶ {11} Et s’il ont pris caucion de lui, l’en demande se il puent puis enpetrer des biens. Et je croi que nenil, se il n’ont donc pris convenable plege, ne blasment se el non de ceu que il ne le pristrent convenable. ¶ {12} L’en doit savoir que quant li bien de l’eritage sont mellé es biens à l’oir, li departemenz des biens ne puent pas estre enpetrez ; car, puis que li biens sont assenblez, il ne puent pas estre departiz. Mes s’il i a possessions ou sers, ou bestes, ou autres choses qui puissent estre departies, illoc puet estre departement enpetrez, ne l’en ne doit pas oïr celui qui dit que eles sont mellees à autres choses ; car ce ne sont pas choses qui puissent si estre mellies que l’en ne les puisse departir. ¶ {13} Ce que a esté dit, que departemenz ne puet estre enpetrez aprés moult pres lonc tens, doit estre issi entendu que l’en ne demant pas departement puis .v. anz aprés ce que li heritages sera receuz. ¶ {14} Il convindra que li prevoz conoisse de totes ces choses, savoir mon se li departemenz doit estre fez, et nus autres ne le puet ostroier que li prevoz. ¶ {15} Se aucuns a pris gage de l'oier, l’en ne li doit pas puis ostroier departement des biens ; quar, desque il s’est tenuz à l’oir par aucunne meniere, il ne doit pas puis estre oïz s’il demande departement des biens. ¶ {16} Se il a plusors creanciers et li .i. se tiegnent à l’oir et li autre ne se i tienent pas, et cil qui ne s’i tienent pas enpetrent departement des biens, l’en demande se il doivent recevoir o eus cex qui se tindrent à l’oir. Et je croi que nenil, car cil doivent estre conté entre les creanciers à l’oir. {17} Et l’en doit savoir [139rA] que se il i remoint aucunne chose des biens au mort quant ses detes seront poies, li creancier à l’oir en doivent estre poié ; mes li creancier au mort n’avront rien des biens à l’oir2. Et la resons est que li creancier au mort qui enpetrerent le departement des biens ne doivent blasmer se eus non de lor legiereté quant li heirs avoit asez de quoi paier les et li eslurent que li bien au mort fusent departi. Et se il requierent que il soient atachie à biens à l’oir, il ne doivent pas estre oï, quar li departemenz des biens que il requistrent folement3 les depart des biens à l’oir. Se il requistrent folement le departement, il puent enpetrer par don se il mostrent droite cause de ignorance. ¶ {18} L’en doit savoir que li sers qui fu fez hers necesseres o franchisé puet enpetrer departement des biens, si que se il n’atache as biens son patron, il soent en tel cause que quanque il aquerra puis soit departi des autres biens, et ce que li morz li devoit.

Ponponius dit : puis que li heirs avra vendu l’eritage, l’en demandera por noient le departement des biens se il n’i a aucunne sopeçon de barat ; quar les choses que li hers a fetes par bone foi doivent estre fermes.

Totes les foiz que li bien à l’oir ne sofisent pas à poier totes ses detes, non pas tant solement li creancier au mort mes cil à qui li lés furent lessié puent enpetrer departement des biens, si que li creancier soit avant poié ; et ce qui remoindra soit departi à cex à qui li lés sont fet et lessié. ¶ {1} Se cele qui fu franchie fu fete heir en un testamant, et ele requist segont les tables la possession des biens à celui qui n’avoit de quoi poier ce que il devoit, l’en demande se ses choses doivent estre departies de celes de l’eritage. Et le response est que il n’est pas droiz que l’en secore au patron, que il ne soit pas chargiez de detes desque ele s’obliga quant ele demande selonc les tables la possession des biens à celui qui devoit plus que il n’avoit.