XIV. Que il loisse à ovrer en commun flueve [rubr.]

Ulpianus dit : li prevoz dit : « je deffant que force ne soit fete à aucun que il ne li loie à fere ouvre en commun flueve ou en sa rive por garentir son champ qui est lez la rive, por quoi la voie as nés ne soit enpoirie se il done caucion au juigement de bons homes que domages n’en vendra pas dedanz .x. anz, ou il [143rB] ne remoint pas en lui que il ne le donne ». ¶ {1} Il est profitable chose que les rives des fleuves soient refetes et garnies ; autresi, comme uns entrediz en est donc proposez de garnir ‹…› rive de flueve. {2} Il dit donc « por que la voie à nés ne soit enpoirie » ; l’en doit soffrir itel refesement qui n’enpeeche pas la voie as nés. {3} Cil qui vieust garnir la rive par devers lui doit doner caucion que domages ne vindra par ce ou plege selonc la qualité de la persone. Il est contenu en cest entredit que caucion soit donee en cest juigement des bons homes que domages n’en vendra pas dedanz .x. anz. {4} Ceste caucion sera donee as voisins et à cex qui ont lor possessions desus le flueve. ¶ {5} Car il convint prendre garde que caucion lor fust donee ainz que l’ovre fust fete ; car puis que l’ovre fust fete, l’en ne puet pas recevoir le domage par cest entredit, ainz en convenist pledier par la loi qui fet restorer les domages. ¶ {6} L’en doit savoir que li prevoz n’establist ci nule chose de garnir rive de lac ou d’estanc ou de fossé, mes l’en i doit garder ce moisme qui est establi en la rive dou flueve.