Obligation de huit liv. par. de rente assises sur le four de l'abbaye, sis à Paris, près de la Hanterie.

Universis presentes litteras inspecturis, Petronilla abbatissa humilis ecclesie Montis-martirum, eternam in Domino salutem. Notum facimus quod cum Bernardus Lemovicensis et Odelina uxor ejus contulissent in elemosinam perpetuam Isabelli et Adeline filiabus eorumdem, monialibus ecclesie nostre, quamdam domum quam habebant Parisius de conquestu suo sitam in vico qui dicitur Charaurri, ita quod ipse filie sue, scilicet due, fructus sive proventus jam dicte domus communiter inter se perciperent et haberent ad sua necessaria dividendos, necnon et quod illa que aliam superviveret eosdem fructus sive proventus integre perciperet et haberet pro suis necessariis toto tempore vite sue, voluissent que quod post decessum earumdem sororum dicta domus ad conventum ecclesie nostre Montis-martirum devolveretur pro vestibus comparandis ex ejusdem domus proventibus, ad usus nostrarum monialium, prout hec omnia in litteris bone memorie Petri quondam parisiensis episcopi vidimus contineri ; tandem cum dicta domus esset vendita pro centum libris parisiensium, eo quod dominus censive non permittebat ecclesiam nostram eamdem domum tenere in manu mortua, de pecunia redacta ex venditione predicta, que pecunia nobis abbatisse tradita fuit et numerata ex parte dicti conventus, taliter inter nos et conventum ecclesie nostre et dictas filias dictorum Bernardi et Odeline convenit, quod ipse centum libre ponerentur in emendationem, refectionem sive reparationem cujusdam furni ecclesie nostre siti Parisius juxta Hanteriam, qui furnus necessaria refectione indigebat, et eas totaliter jam ibi posuimus, pro qua re, cum hec cederent ad utilitatem, commodum et profectum ecclesie nostre, promittimus per stipulationem sollempniter factam nos reddituram annuatim necnon et soluturam de proventibus furni predicti de dicta peccunia, ut dictum est, ad utilitatem perpetuam nostre ecclesie reparati, eisdem Isabelli et Adeline quamdiu vixerint, vel alteri earum que supervixerit septem libras parisiensium integraliter et viginti solidos conventui ecclesie nostre, terminis inferius annotatis, ad festum Sancti Remigii quadraginta solidos, ad Nativitatem Domini quadraginta solidos, ad Pascha totidem, et totidem ad Nativitatem beati Johannis Baptiste, predictos autem viginti solidos debet tantummodo percipere et habere conventus noster quamdiu vixerint predicte filie, vel altera earumdem, utraque autem filia de medio sublata, cessabit solutio viginti solidorum predictorum, et predicte septem libre ad conventum nostre ecclesie devolventur ab abbatissa que pro tempore fuerit, singulis annis in posterum persolvende, ad vestes comparandas ad usus ipsarum monialium, secundum voluntatem dictorum Bernardi et Odeline ejus uxoris defunctorum, et ad omnes convenciones seu pactiones, necnon et ad omnia alia supradicta tenenda et fideliter adimplenda, nos et furnum ipsum et nostrum monasterium sive ecclesiam nostram, illas etiam que in posterum nobis succedent et que post nos venerint, quantum in nobis est, specialiter obligamus, et de dicta pecunia solvenda, ut dictum est, terminis supradictis oneramus. Et ut hec in perpetuum rata sint et firma in testimonium presentes litteras sigilli nostri munimine fecimus roborari. Datum anno Domini Mº. CCº. tricesimo nono mense Aprili.