Lettre d'une maison assise en la rue Saint-Martin en alant à la maison qui fu Henri le Plaistrien.

Universis litteras inspecturis, Officialis curie Parisiensis salutem in Domino. Notum facimus quod in nostra presencia constitutus dominus Radulphus de Tircis presbiter asseruit coram nobis quod ipse habebat, tenebat et possidebat ex conquestu suo quamdam domum sitam Parisius in vico Sancti Martini de Campis, in censiva et dominio abbatisse et conventus Montis-martirum, contiguam ex una parte domui Henrici Plastrarii et ex altera parte domui Johannis de Crona, ad incrementum census quadraginta quinque solidorum parisiensium debitorum annuatim censive dicte domus, quam siquidem domum prefatus presbiter recognovit in jure coram nobis se ad dictum incrementum census tradidisse, concessisse et quitasse Clementi dicto Lavielle de Monte-martirum, ejusque heredibus et causam habentibus ab eodem aut etiam habituris, reddendo et solvendo dicto censu dicto presbitero et censuario quatuor terminis Parisius consuetis, ita tamen quod dictus Clemens aut ejus heredes seu causam ab eo habituri ponent et publicabunt in melioracionem dicte domus viginti libras turon. infra quatuor annos ex nunc et in antea continue computandos, et tenebuntur dictam domum tenere in eque bono statu vel etiam meliori in quo erit, dicta melioratione in eadem posita et implicata ; ita quod censuarii censum predictum super domo predicta percipere valeant et habere dictis terminis Parisius consuetis, promittens fide data in manu nostra dictus presbiter quod contra tradicionem, concessionem et quitacionem predictas jure aliquo communi vel speciali per se vel per alium non veniet in futurum, immo predictam domum, ut dictum est, ad censum predictum traditam dicto Clementi, ejus heredibus et ab eo causam habituris garentizabit, liberabit et defendit in judicio et extra judicium, ad usus et consuetudines Francie contra omnes sub propriis sumptibus et expensis, se et bona sua quoad hoc obligando et juridictioni nostre se quoad hoc supponendo. Dictus vero Clemens coram nobis constitutus confitens omnia et singula supradicta esse vera et se predictam domum ad censum predictum a dicto presbitero, ut dictum est, recepisse, promisit fide data in manu nostra se dictum censum reddere et solvere dicto presbitero et censuario annis singulis, dictis quatuor terminis Parisius consuetis et ponere et implicare in meliorationem domus predicte dictas viginti libras turon. infra terminum supradictum, et eamdem domum tenere in eque bono statu in quo erit dicta melioratione in eadem posita et implicata, vel etiam meliori, ita quod dicti censuarius et presbiter dictum censum super domo predicta annis singulis, dictis quatuor terminis, percipere valeant et habere, se heredesque suos et omnia bona sua mobilia et immobilia presentia et futura quoad hoc obligans et juridictioni parisiensis curie supponens. Datum anno Domini millesimo CCº. octuagesimo secundo die Jovis post festum beati Martini Aprilis.