Cession par l'abbesse Edeline à la congrégation des veuves dites Beguines, du cens de 28 sols et 3 deniers dus par elle à l'abbaye sur deux maisons sises rue Saint-Merry.

Universis presentes litteras inspecturis, soror Edelina Dei gratia monasterii Montis-martirum humilis abbatissa, totusque ejusdem loci conventus, salutem in Domino sempiternam. Noverint universi presentes et futuri quod cum nos nostro et nostri monasterii nomine congregationem viduarum mulierum manentium versus portam Templi Parisius suo et domus ipsius congregationis nomine justa de causa compelleremus ad ponendum extra manum earum duas domos contiguas sitas in vico novo Sancti Mederici Parisius, contingentes ex una parte domui Allexandri de Chemino pastillarii, et ex altera domui Andree Amplici in censiva et dominio nostro, quas defunctus Jacobus dictus de Forripiis olim matricularius in ecclesia Sancti Mederici Parisius congregationi eidem ad opus domus ejusdem dederat donatione facta inter vivos, ut dicitur, que quidem dicte domus tenentur nobis in tribus denariis annui capitalis census ; et in viginti octo solidis annui incrementi census quibusdam aliis privatis personis ex parte dictarum viduarum nobis extitit requisitum, ut nos nomine quo supra eisdem viduis nomine congregationis predicte in pace et quiete absque compulsione seu coactione aliqua vendendi una cum dicto censu aut extra manum suam ponendi in futurum permitteremus. Nos vero pensata utilitate nostri monasterii predicti, receptis ab eisdem viduis nomine quo supra vel eorum mandato viginti libris parisiensium ex causa predicta, voluimus et volumus, concessimus et concedimus ex nunc inperpetuum, solvendo capitali censu predicto nobis et monasterio nostro, in perpetuum teneant et possideant absque compulsione seu coactione [jus] eas ponendi extra manum earum necnon et incrementum census predictum, si eum acquirere potuerint in futurum, dummodo ipse nobis pro emptione ventas debitas persolvant. Similiter volumus, concessimus et concedimus quod absque compulsione aliqua teneant et possideant in futurum, retenta nobis et monasterio nostro predicto in predictis omnibus omnimoda justicia prout antea habebamus. Confitemur etiam et pro firmo hiis nostris presentibus testamur quod pecunia supradicta inde habita et recepta a nobis in utilitatem nostri monasterii et in acquisitione ipsius est conversa. In cujus rei testimonium et munimen ad perpetuam rei memoriam sigilla nostra presentibus litteris duximus apponenda. Datum anno Domini millesimo CCº nonagesimo quarto, die Mercurii post festum beati Martini hyemalis.