Mathieu de Marly confirme le don de la Couperie.

Ge, Mahi, sires de Marli, fay asavoir a toz cels qui verront ces presentes letres que, par devant moi vindrent Sedile, Agnes Margerite et Perronele, filles jadis Monseignor J. Judas de la Coperie, chevalier, et recognurent que eles avoient donné piecea a Dieu et Notre Dame et a l'église de Porreis, et as nonnains servanz Dieu en icelui leu, els et lor biens muebles et non muebles, en quelque leu que il fussent que en quelque choses ; et mesmement tot l'eritage que eles avoient a la Coperie, du descendement de lor pere en quelque choses que il fust, en terres arables, en mesons o totes les apartenances et en prez. Lesqueles choses muevent en partie de mon fié premierement et en partie du fié Jehan Bernier, de l'eritage Odeline, sa fame, et empres du mien. Adecertes, li diz Jahen et ladite Odeline, sa fame, vindrent devant moi et voldrent et otroierent que l'abeesse et le couvent de Porreis tiegnent des ore en avant, a toz jarz en pez, delivrement et franchement, en main morte, sanz force de vendre ou de metre hars de lor main, totes les choses qui muevent de lor fié et enpres du mien ; et promistrent par lar foi que, encontre cest otroi et cest amortissement, ne vindront james par els ne par autre. Et par cest amortissement fere et otrier, li diz Jahans et Odeline, sa fame ont receu et eu XX livres de torneis de devant diz l'abbeesse et le convent, en deniers numbrez, si comme il ont reconneu devant moi. Autresi, je, devant dit Mahy, qui sui li premiers sires des choses devant nommées en partie, et en partie segonz, si comme il est dit par devant, vueil et otroi que la devant dite abbeesse et le convent de Porreis tiegnent le don lequel les dites Sedile, Agnes, Margerite, Perronnele ont fet et doxné a l'abeie de Porreis, desore en avant a toz jars mes en main morte, sanz force de vendre ou de metre hars de lor main ; sauve a moi et a mes heirs tote maniere de jostice, esceptés cens, ventes, forages et roages qui seroient as devant dites dames, se il i avenoient. Totes ces devant dites choses volt et otroia Margerite, ma fame, et quita ce que elle i avoit ou pooit ou devoit avoir por la reson de doaire ou por autre chose. Et por cest otroi, je, devant dit Mahi, e receu des devant dites Dames XL livres de parisis.

En tesmoig de laquel chose, je, et la devant dite Margerite, ma fame, avons mis nos seaus en ces presentes letres. Ce fu fet en l'an de l'ncarnation Nostre Seignor MCCLXVII, ou mois de jung.