« Hugo, decanus, et Gaufridus, archidiaconus Parisiensis, universis presentibus pariter et futuris, salutem in salutis auctore. Ad omnium noticiam volumus pervenire quod cum inter venerabiles viros Hugonem, decanum, et Willelmum, subdecanum Carnotensem, ex una parte, et Guidonem1, abbatem, et monachos Sancti-Petri Carnotensis, ex altera, super jurisdictione servientum eorumdem abbatis et monachorum, querela verteretur, tandem idem decanus et subdecanus, de assensu Capituli, compromiserunt in nos, sub hac forma, de ipsa querela, pace sine judicio terminanda : 1 Nos igitur utriusque partis receptis testibus, publicatis attestationibus, allegationibus inspectis, habitoque cum viris prudentibus et juris peritis consilio, tandem, ad fugam discordie et mutue dilectionis custodiam, de consensu ambarum partium, sic amicabiliter composuimus : quod decanus et subdecanus Carnotenses, jure archidiaconatus, habeant plenam jurisdictionem in servientibus abbatis et monachorum Sancti-Petri Carnotensis infra banleugam morantibus, ita tamen quod si aliquis de servientibus abbatis vel monachorum trahatur in causam coram decano vel subdecano Carnotensibus, vel eorum officialibus, veniet coram eis, et ipsi tenebuntur dare inducias xv dierum ad componendum coram abbate vel officiali ejus, et interim non poterunt decanus vel subdecanus jurisdictionem suam exercere in illos qui remissi fuerint ad componendum propter hanc causam, hoc excepto quod, si fuerit canonicus Carnotensis, vel clericus de choro, vel eorumdem serviens, vel alius clericus, vel peregrinus, vel transiens, non tenebuntur dare inducias ad componendum, si autem composuerint infra predictos xv dies renuntiabunt illi a quo citati fuerint vel ejus officiali et non tenebuntur de emenda. Quod ne possit in irritum duci aut processu temporis oblivione deleri, presenti pagine mandari fecimus et sigillorum nostrorum munimine confirmari. Actum Parisius, in domo decani, anno gracie MºCCºVº, mense junio. »