« Vous qui estes home de cors dou Chapitre et de l'iglise de Chartres, lequel le Chapitre de Chartres vielt franchir à cleir et à corone avoir, jurez sur sainz que pour la franchise que vous atendez à avoir n'en avez donné au Chapitre de Chartres n'à autre, ne presté, ne promis ne fet donner ne preter, ne fet promestre, ne autre que vous sachez n'a donc ne promis pour vous ne preté, ne fet preter ne promettre deniers ne chouse qui puisse estre achetée pour deniers ou prisiée. Et s'il a esté promis vous non soudrez pas ne ne ferez soudre, neis s'il avoit esté promis par seirement ou par fiance ; ainçois le direz au Chapitre ou ferez dire, et lors en face ou commant li Chapitres sa volenté. Et se aultre l'a promis par vos, vous porchacerez an bone foi qu'il ne sera pas solu ou preté ou poié, et si jurez que dès ore en avant, és afferes dou Chapitre et de l'iglise de Chartres et en ceus qui touchent ou toucheront le Chapitre et l'iglise de Chartres, vous vous aurez et contendrez bien et leaument ne ne donrez deffense ne conseil ne aide à aucun contre le Chapitre ou contre l'iglise de Chartres ou contre aucun chanoine de Chartres tant com il sera chenoines, és causes ou és quereles ou és afferes qui touchent ou toucheront l'iglise ou le Chapitre de Chartres ou aucun chenoine de Chartres, ne ne ferez tricherie ne boidie contre le Chapitre de Chartres ou contre aucun chenoine de Chartres tant com il sera chenoines. Et si jurez que se vous saviez ou aperceviez que l'en deust ou vousist fere honte ou désenneur ou doumage au Chapitre de Chartres ou à aucun chenoine de Chartres, vous le destorriez et destorberiez à vottre pooir, et se vous non poviez destorber vous le feriez à savoir au plus toust que vous porriez au Chapitre de Chartres et au chenoine à qui l'en voudroit fere la honte ou la désenneur ou le doumage. Et si jurez que dès ore en avant vous ne pleiderez ne ne ferez semondre en plet, nais pour vostre querelle propre, le Chapitre de Chartres ou aucun chanoine de Chartres ou aucun home ou fame de cors ou hoste de l'église de Chartres, jusque vous l'aiez monstré en Chapitre et requis de soi amender vers vous de la querelle dom vous le voudrez treire en plet et que Chapitre vous en soit défaillant. Et si jurez que dès ore en avant vous porterez enneur et révérence au Chapitre de Chartres et à chascun chanoine de Chartres tant com il sera chanoines de Chartres. Et si jurez que se dès ore en avant avenant que vous vous mariessiez, vous dès lors en avant ne porteriez point de corone, ainz recorriez arrières en servitude et seriez dès lors home de cors de Chapitre come devant. Et se vous ne vous mariiez pas et vous ne portiez corone, ausint de lors en avant seriez homme de cors dou Chapitre comme devant. Et jurez que s'il avenoit que li Chapitres de Chartres ou aucun chanoine de Chartres eust querelle ou cause contre aucun home ou aucune fame ou contre plusieurs, sur ce que cil ou celles fussent home de cors ou fames de cors de l'iglise de Chartres, contre qui li Chapitres ou li chanoine auront la querelle, vous porterez loial tesmoing sanz fere ou sanz doner en gage de bataille, à la requette dou Chapitre de Chartres ou dou chanoine dou parenté ou dou lignage, à ceus et à celles contre qui li Chapitres ou chanoine de Chartres auront la querelle, neis se cil ou celles contre qui il auroient querelle vous apartenoient de bien près. Derechief vous jurez sur sainz que vous ne ferez ne ne ferez fere coumune en la cité de Chartres ne aillors contre le Chapitre ne contre l'iglise de Chartres, ainçois destorberez à vostre povoir qu'el ne soit feite. Et s'elle ert fete, vous ne serez pas de celle coumune. Et si voulez et otroiez que se vous venez contre aucune des chouses devant dites que dès lors en avant saiez home de cors dou Chapitre comme vous souliez estre. Et si jurez que contre le Chapitre de Chartres ne contre l'iglise ne contre aucun chanoine de Chartres ne ferez aliance, et s'elle est fecte vous n'en seriez pas, et se vous le saviez vous le feriez à savoir au Chapitre ou au chanoine contre qui l'aliance seroit fete. Derechef vous jurez que se la merie dou Chapitre vous avient par raison d'eschaaite ou de descendue ou par autre reison, se vous la voulez avoir et retenir, vous leirez la corone et serez home de cors comme devant, ou se ce non vous n'aurez pas la merie, ainz vendroit celle merie au plus prochains éritiers sanz contredit qui vous i meissiez. Ces chouses, si comme eles sunt devisées, vous jurez à tenir et garder, bien et leaument, en toutes et en chacunes chouses dessus dites. Et si jurez que de toutes ces choses vos donriez lettres seelées dou seel de la court à l'official de Chartres ou de autre seel auttentique. S'insit, vous ait Dex et tuit saint et toutes saintes. — Et il respondera : S'insi que vous l'avez dit, et leu le jurge à tenir et garder ; se Dex m'aist et tuit saint. »