« Alexander, episcopus, servus servorum Dei, dilectis filiis decano et Capitulo ecclesie Carnotensis, salutem et apostolicam benedictionem. Hiis que ab ecclesiarum prelatis pro ipsarum utilitatibus provide statuuntur libenter adicimus apostolici muniminis firmitatem, ut intemerata consistant cum nostro fuerint presidio communita. Significastis siquidem nobis quod cum, quondam cantore ecclesie vestre a quibusdam iniquitatis filiis interempto, non possetis secure in vestra ecclesia commorari, dilecti filii Johannes et Symon, archidiaconi, et quidam alii ecclesie vestre canonici, de communi assensu et de auctoritate vestra, provide statuerunt ac etiam ordinarunt ut claustrum ejusdem ecclesie certo ambitu vallaretur1, et presentes canonici, domos infra hujusmodi ambitum aut per domos suas in claustrum ipsum introitum non habentes, cotidianas distributiones percipiant, ac si in ipsa ecclesia horis matutinalibus interessent, dummodo, infra muros civitatis Carnotensis pernoctantes, aliquibus duabus horis diei in divinis officiis presentes habeantur in ecclesia supradicta, alia nichilominus edentes pro ipsius ecclesie utilitate statuta salubria et honesta, prout in litteris inde confectis dicitur plenius contineri. Nos igitur vestris devotis supplicationibus inclinati, statuta hujusmodi, sicut provide ab archidiaconis et canonicis predictis sunt edita, rata habentes et grata, illa, non obstante qualibet consuetudine vel statuto ipsius ecclesie contrariis, vallatis juramento vel quavis firmitate alia, auctoritate apostolica confirmamus et presentis scripti patrocinio communimus. Nulli ergo omnino........ Datum Laterani, ii kalendas martii, pontificatus nostri anno tercio. »