« In nomine Patris et Filii et Spiritus Sancti, amen. Anno Domini MºCCº quinquagesimo quinto, die martis in festo beati Arnulphi continuata a die lune precedenti, nos Henricus, Dei gratia, Senonensis archiepiscopus, Renaudus, Parisiensis, Guillelmus, Aurelianensis, Guido, Altisiodorensis, Nicholaus, Trecensis, Dei gratia, episcopi, et Alermus, miseracione ejusdem, electus Meldensis confirmatus, in negocio inquisitionis, facte auctoritate concilii provincialis, super interfectione bone memorie R[aginaldi], quondam cantoris Carnotensis, auditis probacionibus et presumpcionibus habitis contra Hugonem de Chavergneio, canonicum Carnotensem, et Colinum, fratrem ejus, qui se voluntati et ordinacioni concili submiserunt, prestito super hoc juramento et apposita pena, de bonorum consilio, dictum nostrum et ordinacionem nostram proferimus in hunc modum, videlicet quod dicti Hugo et Colinus frater ejus, per quinquennium continuum, apud Obsevefort, in Anglia, morentur, et, elapso dicto quinquennio, non revertentur citra mare, nisi prius nos, archiepiscopus Senonensis et suffraganei nostri, certificati fuerimus a diocesano loci illius et aliis personis autenticis per patentes litteras quod, per dictum continuum quinquennium, moram fecerint in loco supradicto, et precipimus ut iter arripiant, infra octabas Assumptionis beate Virginis continue profecturi. Et exnunc privamus perpetuo dictum Hugonem voce et loco in capitulo Carnotensi, ita quod in electionibus vel aliis tractatibus in Carnotensi capitulo se non ingerat de cetero nec aliquatenus admittatur. Item nos, iidem supradicti, eisdem anno et die, in negocio inquisitionis, facte auctoritate provincialis concilii, super interfectione cantoris predicti, auditis confessionibus Gileberti, dicti Coci, et Jacobi, dicti la Beloce, clericorum, et aliis pluribus habitis contra ipsos, de consilio bonorum, auctoritate ejusdem concilii, sententialiter diffinivimus dictos Gilebertum et Jacobum in carcere retrudendos, donec auctoritate concilii extrahantur, et si extrahuntur, auctoritate concilii exnunc diffinimus ipsos ultra mare in terra Jherosolimitana exilio perpetuo deportandos1. Actum Parisius, anno et die martis predictis. »