« Universis presentes litteras inspecturis, Garinus, abbas, et conventus Beati-Johannis-de-Valleia Carnotensis, salutem in Domino. Cum, ex pia antecessorum nostrorum devotione, processio ecclesie Beate-Marie Carnotensis ad ecclesiam nostram accedens, procurationem, quarta feria Paschalis ebdomade, et potum cum chenetellis, in vigilia Decollationis beati Johannis-Baptiste, sine contradicione, perciperet, quia in dicte procurationis et potus et chenetellorum, ob turbarum instantiam, nobis importune pluries et dampnose, sibi etiam inhoneste res fieri videbatur, decanus et Capitulum ejusdem ecclesie, ad fugam discordie et mutue affectionis custodiam et evitanda prorsus incommoda, predictam procurationem, potum et chenetellos nobis in perpetuum quitaverunt, processione Beate-Marie Carnotensis ad ecclesiam nostram, more solito, prefatis diebus nichilominus accedente, salvis tamen in utraque processione sex denariis puerorum quos in missa contigerit cereis et thuribulo deservire. Preterea cum decanus et Capitulum Carnotense ad communitatem suam, ob ipsorum communem utilitatem, redegissent quarteria sua prebendalia, in quibus jus habere videbamur, ratione annualium ex obitu canonicorum Carnotensium ad nos pertinentium, ipsi, indempnitati nostre necnon et honestati proprie consulentes, concesserunt nobis, in hujus rei recompensationem, quadraginta solidos annui redditus, annuatim, in crastino Purificationis beate Marie, de sua camera persolvendos. Nos autem dictis decano et Capitulo Carnotensi, super his et aliis pluribus beneficiis merito non ingrati, in recompensationem dictorum beneficiorum, furnum quem habebamus in vico Vassalorum, nobis non multum utilem, sibi vero plurimum necessarium, concessimus, dedimus et quitavimus, ab eisdem, in perpetuum, quiete et pacifice possidendum. In cujus rei robur, testimonium et munimen, ad peticionem ipsorum, presentes litteras fecimus conscribi et sigillorum nostrorum munimine roborari. Actum Carnoti, anno Domini millesimo ducentesimo vicesimo septimo, mense junio. »