École des chartes » ELEC » Le formulaire d'Odart de Morchesne » Passages et sauf conduiz » Autre sauf conduit pour un estrangier
[fol. 84v]
[fol. 85]

Autre sauf conduit pour un estrangier

Charles etc., a tous noz lieuxtenans, connestable, mareschaulx, admiral, visadmiral, seneschaulx, gouverneurs, bailliz, prevostz, chastellains, capitaines, maires, eschevins, gardes de bonnes villes, citez, chasteaulx, forterresses, pons, pors, passages, jurisdicions et destroiz, justiciers, officiers et subgez, amis, aliez et bienvueillans de nous et de nostre royaume ausquelz ces presentes seront monstrees, salut. Savoir faisons que a la supplicacion d'aucuns noz especiaulx serviteurs et pour certaines causes a ce nous mouvans nous avons donné et donnons par ces presentes a Tel, marchant du royaume de Portingal, seurté et sauf conduit de la date de ces presentes jusques a un an pour admener marchandise en nostredit royaume, y charger vins et autres denrees ou il verra son proufit et les mener ou faire mener oudit royaume de Portingal. Si mandons a vous, noz justiciers, officiers et subgetz, prions et requerons vous, nos amis, aliez et bienvueillans, que ledit Tel, marchant, et son varlet ensemble ses denrees et marchandises et les mariniers, patrons, commitres1 et autres gens qui les meneront vous souffrez et laissiez passer, sejourner et retourner par mer et par terre, en faisant sa marchandise paisiblement et plainement, sanz donner ne souffrir estre donné ledit temps durant audit Tel, a sondit varlet ne aux mariniers de son vaissel aucun arrest, destourbier ou empeschement en leurs corps ou en leurs biens ou marchandises. Non obstans quelzconques marques repulsables ou contremarques jugees ou a juger, ordonnances, mandemens ou defenses a ce contraires. Car tel est nostre plaisir. Pourveu que le dessusdit ne ceulx de sa compaignie ne facent ou procurent faire, en appert ou en secret, chose prejudiciable a nous, a nostre seigneurie ne a noz subgez. Donné etc.

[10.10.a] ¶ Nota que a subgetz ou bienvueillans le roy ne use point de ce mot sauf conduit ne ne donne sauf conduit fors a ennemis ; et, quant l'en fait un sauf conduit, on y doit tousjours limiter le temps combien il a a durer.

[10.10.b] *  ¶ Item tousjours y doit estre mise la provision que celui a qui on donne sauf conduit ne fera ne ne pourchassera etc., combien qu'elle y est entendue de soy.

[10.10.c] *  ¶  Item nota qu'on n'y met pas communement qu'on face administrer vivres ne autres neccessitez, comme l'en fait a amis ou subgetz, et en toutes autres [fol. 85v] choses, puisque c'est pour ennemis ; on doit faire la lettre la plus maigre et le moins a l'avantage de l'ennemy qu'on puet, sinon qu'on sceust bien que celui a qui on donne le sauf conduit venist pour aucun bien ou qu'il fust commandé par le roy ou mes seigneurs du conseil. Et en aucuns saufz conduiz met on aucune foiz une autre provision, c'est assavoir : pourveu que a l'entree des villes et autres lieux ou passera celui qui a le sauf conduit, il face exhibicion dudit sauf conduit ; et y met on notanter cette clause a ce qu'on saiche par ou ilz passent, qu'ilz sont ennemis et qu'on s'en donne garde comme d'ennemis.

[10.10.d] *  ¶  Item nota aussi que communement on n'y met pas ce mot sejourner, mais seulement passer et rapasser.

[10.10.e] *  ¶  Item nota que les Anglois et Portingaloiz paient en chancelerie de France chascun un escu d'or pour le seel et, se le roy faisoit faire plus forte ou meilleur monnoye d'or que escuz, meilleur doivent paier, ou ceulz de France ne paient que VI solz parisis ; et se le sauf conduit est pour pluseurs, ilz doivent paier chascun un escu et sic consequanter, sinon quant ilz sont varlez ou serviteurs, car le maistre acquite ses serviteurs, mais que la lettre porte qu'ilz soient serviteurs. Et ceste rigueur vient d'eulx mesmes, car en Angleterre chascun François paie un noble ou plus forte piece d'or, se plus forte y avoit cours.

[10.10.f]  ¶   Les Ytaliens, Lombars et autres Oultremontains paient XI solz parisis pour seel de simple queue en chancelerie de France, et les juifz en paient III frans.

[10.10.g]  ¶  Item les Navarrois paient pour scel XXIIII solz parisis, ou un François ne paieroit que VI solz parisis.


1 Comite : officier qui commandait la chiourme à bord d'une galère (Godefroy, t. IX, p. 130).