Autre des generaulx ou commissaires

Les generaulx conseillers etc., a Tel, receveur etc., salut. Comme nagairesa le roy nostre seigneur estant devant B. eust commis Tel a venir en telz et telz païs pour faire certains achaptz de blez pour pourveoir et fournir aux places de etc. et ou besoing seroit, et nous eust ledit seigneur escript que nous pour son voyage lui tauxissions ce que bon nous sembleroit, et il soit ainsi que ledit N. vint en ceste ville par devers nous, et par le conseil estant par deça fut advisié que le tresorier de mondit seigneur et lui yroient ensemble devers madame la duchesse de Bourbon1, a laquelle icelui seigneur escrivoit pour celle cause, affin que lesdiz blez se peussent lever et trouver es païs de monseigneur de Bourbon, et, pour ce qu'ilz ne trouverent pas que bonnement se peust faire et que ledit achat d'iceulx blez n'eust pas esté proufitable selon le pris a quoy ilz estoient, lors s'en retournerent par devers nous en ceste ville et de cy ala ledit N. par devers le roy nostredit seigneur et son conseil pour en faire le rapport, ouquel voyage, selon ce qu'il nous a affermé, il a vacqué et demouré tant en alant et venant devers nous, alant devers madicte dame de Bourbon, retournant cy et aprés alant devers le roy nostredit seigneur, [fol. 139v] par l'espace de XXXVI jours, lui II e a cheval, pour lequel temps, consideré la grant chierté de vivres qui generalment est partout, nous lui avons tauxé et ordonné, tauxons et ordonnons par ces presentes la somme de tant livres, sur laquelle somme sont a rabatre M livres que nous lui feismes bailler par vous quant il party de cy pour aler devers madicte dame de Bourbon, ainsi reste a lui paier pour ledit voyage […]b livres tournois, si vous mandons que des deniers de vostre recepte vous lui paiez, bailliez et delivrez ladicte somme de tant. Et par rapportant ces presentes et quittance de lui tant seulement, icelle somme sera allouee en voz comptes et rabatue de vostre recepte partout ou il appartendra. Donné soubz noz signetz etc.