Commission a demander empruntz1

Charles etc., a noz amez et feaulx conseillers Telz et Telz, salut et dilection. Comme pour aucunes consideracions etc., pour ce est il que nous, qui desirons sur toutes choses mondaines, ainsi que plus que nul autre y sommes tenuz et obligiez, conserver et defendre nostre seigneurie et preserver noz bons et loyaulx subgetz de cheoir en la servitute de nosdiz ennemis, considerans comme dessus que de noz finances ordinaires n'y pourrions de present sanz aucun aide ou avancement d'autruy si hastivement et vallablement pourveoir comme le cas le requiert, et qu'il est mieulx raison et chose convenable que, aprés l'exposicion de nosdictes finances que n'y avons jamais voulu ne voulons en riens espargnier mais comme raison est les y mettre avant et du tout employer, les vassaulx et subgetz de nosdiza païs qui ont faculté et puissance et ausquelz la chose peut beaucoupb touchier aident aucunement a supporter lesdictes charges que autres qui pour leur mesmes fait ont assez a faire a souffrir d'autre part2, mesmement que l'aide que en ce nous feront ne sera que un simple prest a le recouvrer seurement et en brief temps, et confians a plain de voz discrecions, loyaultez et bonne prudence, vous ou les deux de vous en l'absence de l'autre pour les causes dessusdictes et pour pourveoir plus promptement au paiement desdictes gens d'armes et de trait, afin de les emploier a la defense desdiz païs et eviterc les pilleries et gastemens de biens que autrement pourroient faire sur les subgetz d'iceulx, avons commis, ordonnez et depputez et par ces presentes commettons, ordonnons et depputons pour requerir tant par voye amiable que aussi de [fol. 126v] sommacion, se mestier est, a toutes les personnes de telz païs escriptes et denommees en certain roolle de la date du jour d'uy, signé de nostre main et seellé de nostre seel secret, que pour ce vous avons baillié, qu'ilz nous prestent et aident les sommes de deniers contenues oudit roole, chascun selon la declaracion ou specificacion d'icelui roole, pour iceulx deniers convertir et employer par vostre ordonnance ou fait dessusdit et non ailleurs. Lesquelz deniers par eulx ainsi bailliez et prestez, par rapportant etc. voz lettres de mandement avecques la cedule ou certifficacion de celui qui les aura receuz et que commis y avons de quoy faire et de lui tauxer gaiges et voiages de chevaucheurs et autres mises et despens neccessaires et convenables pour les choses dessusdictes et les deppendences d'icelles competensd vous donnons puissance et auctorité, nous avons ordonné et voulons leur estre renduz et restituez de l'argent de certain aide et X me3 que par noz autres lettres du jour d'uy avons pour ceste cause ordonnez estre miz suz esdiz païs ou des deniers des monnoyes et autres noz finances a tel temps et terme comme par vous sera advisié et appoinctié avecques eulx et lesquelles monnoyes et finances voulons et consentons par vous obligees et ypothequees. Et des maintenant pour lors mandons et enjoingnons par ces presentes tant aux receveurs ou autres qui par vous seront commis a recevoir lesdiz aide ou X me que aux maistres particuliers desdictes monnoyes que tout ce que par vosdictes lettres leur sera sur ce ordonné ilz facent et acomplissent, toutes autres charges arriere mises, non obstans que sur ce n'aient autres lettres ou mandemens des commissaires et gouverneurs des finances. Et ou cas que aucuns des denommez oudit roole seroient refusans ou contredisans de prester lesdictes sommes sur eulx imposees, nous, pour l'urgent et eminent neccessité qui en est, voulons que a ce les contraingnez ou faites contraindre par la prinse et detencion de leurs biens et temporelz et plus avant s'il vous semble qu'il soit besoing et qu'il est acoustumé de faire pour noz propres debtes. De ce faire vous donnons povoir, auctorité et mandement especial ; et mandons a tous noz justiciers, officiers et subgetz que a vous et a voz commis en ces choses faisant et executant vous obeïssent et entendent et vous prestent conseil, confort et aide, se besoing en avez et par [fol. 127] vouse en sont requis. Car ainsi nous plaist il et l'avons ordonné estre fait, non obstans quelzconques opposicions, appellacions ou contradicions au contraire. Et par rapportant ces presentes ou vidimus d'icelles soubz seel autentique avec vostre mandement et quittance d'iceulx qui auront eu lesdictes sommes desdiz aides ou monnoyes, icelles sommes seront allouees es comptes et rabatues de la recepte desdiz receveurs et maistres desdictes monnoyes et chascun d'eulx qui paié les aura par noz amez etc. et autres qu'il appartendra. Ausquelz etc. Non obstans que lesdiz receveurs et maistres desdictes monnoyes n'aient sur ce autre mandement des generaulx, conseillers, commissaires ou autres gouverneurs de noz finances. Donné etc.