Commission pour un qui est marchant ou proviseur de l'ostel d'un prince

Charles etc., a tous mareschaulx, seneschaulx, cappitaines de gens d'armes et de trait, gardes de bonnes villes, chasteaulx, forteresses, pons, pors, passages, peages, travers, acquictz, coustumes, justiciers, officiers et subgetz ou a leurs lieuxtenans et autres quelzconques bienvueillans de nous et de nostre royaume et a chascun d'eulx, si comme a lui appartendra, ausquelz ces presentes seront monstrees, salut. Savoir vous faisons que nous avons commis, ordonné et establi, commettons, ordonnons et establissons par ces presentes N. maistre des garnisons de nostre hostel ; et voulons que icelui N. [fol. 131] ou ses commis et depputez, portans ces presentes, puissent, appellees et presentes les justices des lieux, arrester et acheter blez, avoines et vins pour la despense de nostredit hostel, partout ou trouver les pourront, en paiant promptement de ce que arresté et acheté auront pris raisonnable1, au dit et tauxacion des justices desdiz lieux, et avec ce puissent arrester et prendre chevaulx, charrettes, charroiz et autres voictures, par eaue et par terre, avec toutes autres choses necessaires pour iceulx blez, avoines et vins amener et faire venir partout ou nous serons, en les paiant et contentant de leurs salaires raisonnablesa. Si vous mandons et estroictement enjoingnons et a chascun de vous, si comme a lui appartendra, que audit N. et a ses commis et depputez, portans ces presentes, en faisant lesdiz arrest et achatz vous baillez ou faites bailler bonne obeïssance avec conseil, confort et aide, a leurs despens, se mestier en ont et requis en estes. Mandons aussi que ledit N. et sesdiz commis et depputez, portans ces presentes, comme dit est, vous faites, souffrez et laissez passer et rapasser avec lesdiz blez, avoines, vins, voictures, chevaulx et conduiseurs d'iceulx a toutes heures, par eaue et par terre, franchement et quittement, tant en alant comme en retournant par toutes voz gardes, jurisdicions, compaignies, coustumes et autres destroiz, sanz leur donner ou faire ne souffrir estre fait ou donné aucun arrest, destourbier ou empeschement ne aussi pour ce paier aucun acquict ne autre reddevance quelconque. Et tant en faites, chascun endroit soy, que le service de nostredit hostel n'en soit aucunement delayé ou empeschié et que faulte n'y ait ; ouquel cas nous ferions faire punicion des delinquans ainsi que de raison seroit. Ces presentes aprés etc. Donné etc.

[13.8.a] ¶  Nota que par ceste commission le marchant du prince ne doit riens prendre ne acheter sanz la justice des lieux ; en oultre, qu'ilz doivent paier promptement ce qu'ilz prennent ne ne se doivent excuser s'ilz n'ont l'argent de leurs assignacions.

[13.8.b] * ¶ Aussi nota qu'il fault que celui qui fait la prinse porte l'original de ces lettres de commission et ne suffist pas du vidimus, car on s'attent aux marchans de bailler leurs lettres originales a gens de bien et, s'ilz font autrement que bien, le marchant en doit respondre.

[13.8.c] * ¶ Item nota qu'on ne doit pas donner ceste commission a plus long temps que dure le marchié de celui a qui on la donne etc.