École des chartes » ELEC » Le formulaire d'Odart de Morchesne » Lettres de finance » Tauxacion de gaiges a soudoyers d'une garnison
[fol. 143]

Tauxacion de gaiges a soudoyers d'une garnison

Charles etc., aux commissaires etc. Comme par noz autres lettres nous ayons baillié a nostre bien amé escuier d'escuierie P. 1 la garde et cappitainerie de nostre grosse tour de Bourges et pour la seurté et defense de ladicte tour et a ce que aucun inconvenient ne s'en ensuive, veu mesmement la dangereuse disposicion du temps qui court, lui ayons ordonné et enjoint tenir continuelment en ladicte grosse tour six hommes d'armes, VI arbalestriers, deux portiers, un canonier et un artilleur, savoir vous faisons que nous, considerans la grant chierté de tous vivres qui est a present et l'affoiblissement et empirence des monnoyes, par quoy lesdictes gens d'armes, portiers, canonnier, artilleur ne pourroient pas vivre des gaiges anciens et ordinaires, voulons et ordonnons par ces presentes que chascun desdiz hommes d'armes ait et preigne des deniers desdictes finances XL livres tournois par mois, arbalestriers XX livres tournois, chascun desdiz portiers, canonnier et artillier2 XX livres tournois de gaiges par chascun mois jusques a nostre cassement, qui monteront en tout la somme de etc. par mois. Si vous mandons et enjoingnons que par l'un de noz tresoriers des guerres vous des deniers a lui ordonnez ou a ordonner pour convertir ou fait de son office faites faire paiement audit Tel [fol. 143v] desdiz gaiges au feur et pris dessusdit, pour bailler et distribuer ausdictes gens d'armes, arbalestriers, portiers, canonnier et artilleur a commencer du jour de la date de ces presentes et jusques a nostredit cassement. Et par rapportant cesdictes presentes ou vidimus d'icelles et quittance dudit Guion et certifficacion d'icelui d'avoir tenu lesdiz tant hommes d'armes, arbalestriers, portiers, canonnier et artilleur en garnison en ladicte tour avecques leurs noms et seurnoms sanz autre enseignement, monstres ou reveues, nous voulons tout ce que paié en aura esté par ledit tresorier estre alloué en ses comptes et rabatu de sa recepte par noz amez etc. Non obstant qu'il n'appere par monstres, reveues ou autrement, comme on a acoustumé, du serement, noms et seurnoms desdiz souldoyers et quelzconques ordonnances etc. Donné etc.


1 Ce personnage est désigné un peu plus loin dans la formule sous le nom de Guyon. Nous en déduisons qu'il s'agit de Guyon Thomasse, escuier d'escurie du regent, puis du roi Charles VII, capitaine et garde de la grosse tour de Bourges de 1421 à 1426 (Gallia regia, t. I, n° 4023).
2 Le ms, qui donne ailleurs artilleur, porte bien ici en toutes lettres artillier (forme que donne S aux quatre occurrences, alors que MP abrègent les listes). Il faut en conclure que les deux formes étaient ressenties comme largement équivalentes, même si les dictionnaires de Godefroy et de Huguet tendant à spécialiser artillier au sens de “fabricant d'armes de trait, d'artillerie” (Godefroy, t. I, p. 414, qui pose plutôt l'équivalence au t. VIII, p. 194).