École des chartes » ELEC » Le formulaire d'Odart de Morchesne » Chappitre de diverses lettres diffuses » Lettre pour gens a demourer a la garde des forteresses sanz aler a l'armee
[fol. 111v]

Lettre pour gens a demourer a la garde des forteresses sanz aler a l'armee

Charles etc., au bailly des exempcions de Touraine, d'Anjou et du Maine et a tous les autres justiciers de nostre royaume ou a leurs lieuxtenans, salut. Savoir faisons que, oÿe la supplicacion de nostre amé et feal conseiller l'evesque d'Angiers1, contenant que, se par deffault de garde ses chasteaulx et forteresses de Chalonne2 et de Rochefort3, qui sont fortes places et avantageuses, estoient prinses [fol. 112] ou occuppees par les ennemis, inconvenient et dommage irreparable s'en ensuivroit a lui et a tout le païs d'environ, nous, ce consideré et les bons services que ledit evesque a faiz a nous et a noz predecesseurs par tres long temps et autres causes a ce nous mouvans, voulons et nous plaist que Telz et Telz, escuiers, demeurent a la garde et defense de sesdiz chasteaulx et forteresses de Rochefort et de Chalonne et iceulx escuiers et chascun d'eulx avons exemptez et quittiez, exemptons et quittons par ces presentes et pour ceste foiz de grace especial de nous venir servir ceste saison contre noz ennemis et adversaires en l'armee pour laquelle avons fait crier et publier nostre ban et arriere ban. Si vous mandons et enjoingnons, et a chascun de vous si comme a lui appartendra, que ledit evesque et lesdiz Telz et chascun d'eulx vous faites, souffrez et laissiez joïr et user plainement et paisiblement de nostre presente grace, exempcion et voulenté, sanz leur faire ou donner ne souffrir estre fait, mis ou donné aucun arrest ou empeschement en corps ne en leurs terres ou autres biens quelzconques en quelque maniere que ce soit ; ainçoiz, se miz ou donné leur estoit, ostez le ou faites oster et mettre a plaine delivrance. Non obstans nostredit ban et arriere ban et les peines dedanz inflictes4, ordonnances, mandemens ou defenses a ce contraires. Donné etc.


1 Hardouin de Bueil fut évêque d'Angers du 16 juin 1374 à sa mort, survenue le 15 janvier 1439. Il était fils de Jean du Bueil, seigneur de Montrésor, Saint-Calais et La Marchère, qui fut lieutenant général du duc Louis Ier d'Anjou pour l'Anjou, le Maine et la Touraine, et plus tard sénéchal de Nîmes et Beaucaire, puis de Toulouse. Hardouin lui-même combina la charge épiscopale avec des fonctions séculières : il dirigea la chambre des comptes du duc d'Anjou à partir de 1382 ; il fut également chancelier de la duchesse d'Anjou Marie de Bretagne, une charge dans laquelle Yolande d'Aragon le maintint en 1417. Partisan de la papauté d'Avignon, il assista aux réunions du clergé de 1394 et 1398 à Paris. Il rédigea des statuts pour son diocèse en 1423 (Fasti ecclesiae gallicanae, t. 7, Diocèse d'Angers, par Jean-Michel Matz et François Comte, Turnhout, 2003, p. 175-179).
2 Chalonnes-sur-Loire (Maine-et-Loire, ch.-l. cant.).
3 Rochefort-sur-Loire (Maine-et-Loire, cant. Chalonnes-sur-Loire).
4 Lecture incertaine. Nous interprétons ce mot comme un décalque du latin inflictas, infligées. Du reste, le substantif infliction est attesté au XVe siècle (Godefroy, t. X, p. 14).