Adjournement en parrie

Charles etc., a nostre tres chier et tres amé frere le duc d'Orleans et de Valois, conte de Bloys et de Beaumont et seigneur de Coucy1, salut et dilection. Comme Jehan Le Fevre, escuier, seigneur de Mitry2, ou son procureur pour lui se dit deuement avoir appellé a nous ou a nostre court de parlement de certaine sentence, jugement, condempnacion, reffuz et denee de droit contre lui faiza, donnez et proferez par vostre gouverneur de Blois ou son lieutenant a l'instance, prouffit ou pourchaz de Jehan Beringault ou autrement comme de nulle ou nulz et, se aucune ou aucuns sont ou estoient, faulz et mauvais, faulse et mauvaise, nous vous adjournons aux jours ordinaires de tel païs, et vous enjoingnons que vous ayez avecques vous vostredit gouverneur de Blois ou son lieutenant, pour soustenir et defendre lesdiz sentence, jugement, condempnacion, reffuz et denee de droit, les veoir adnuller ou les reparer et amender, se mestier est et faire se doit, sinon pour proceder en ladicte cause d'appel et en oultre comme raisonb. Et neantmoins vous defendons que pendant ladicte cause d'appelc vous ne attemptez ou innovez ne faites ou souffrez attempter ou innover aucune chose contre ne ou prejudice d'icelle ne dudit appellant en quelque maniere que ce soit ; ainçoiz, se faicte estoit, faites la reparer sanz delay et mettre au premier estat et deu. Donné etc.