Autre pension a vie

Charles etc., a tous etc. Savoir faisons que nous, considerans les tres grans et honnorables services que N., du païs d'Escoce, a fais par long temps a feu nostre tres chier seigneur et pere, cui Dieu pardoint, et a nous ou fait des guerres a tout certain nombre de gens d'armes et de trait dudit païs d'Escoce, et mesmement en la derreniere bataille et victoire que Telz et Telz, desquelz il est parent, et noz gens ont eue a Baugé en Valee a l'encontre des Angloiz noz anciens ennemis et adversaires1, et esperons que plus encora face ou temps a venir, icelui N., en recongnoissance de ce et aussi que tantost aprés ladicte bataille feusmes par nosdiz cousins requis de pourveoir icelui Thomas de l'office de nostre seneschal de Berry ou lieu de feu N. qui mourut a ladicte journee2, duquel office nous pour certaines consideracions disposasmes en autre maniere en octroyans des lors audit N. de le autrement recompenser, ce que encores n'avons fait jusques a present, avons ordonné et ordonnons par ces presentes de grace especial, pour lui aidier a avoir et maintenir plus honnorablement son estat et a ce que de plus en plus il soit curieux et abstraint de bien servir, la somme de tant a prendre et avoir par chascun an sa vie durant par maniere de pension des deniers desdictes finances. Si donnons en mandement, en enjoingnant expressement, a noz amez et feaulx les generaulx etc. que par nostre amé et feal G., receveur general desdictes finances3, ou par autre qui pour le temps a venir s'entremettra du gouvernement de ladicte recepte ilz facent d'ores en avant paier et bailler audit N. ou a son certain commandement ladicte somme de tant de pension par [fol. 141] an sa vie durant, comme dit est. Et par rapportant ces presentes ou vidimus d'icelles et recongnoissance souffisant sur ce seulement, nous voulons que tout ce qui paié et baillié lui en aura esté soit alloué es comptes etc. par noz amez et feaulx gens etc.  ; ausquelz etc. Non obstans quelzconques ordonnances etc. En tesmoing etc. Donné etc.