Establissement de foires en françois1

Charles etc. Savoir faisons a tous presens et a venir que, comme a la supplicacion de noz amez les esleuz, bourgois et habitans de la ville de Clermont en Auvergne, nous requerans avoir une foire audit lieu de Clermont le jour de saint Blaise, informacion ait esté faicte par nostre bailly de Saint Pere le Moustier ou son lieutenant, a ce commis par noz autres lettres, de et sur le proufit ou dommage que nous et les habitans de ladicte ville de Clermont et du païs d'environ aurions se ladicte foire estoit par nous cree et donnee et icelle informacion avec l'advis dudit bailly ou lieutenant et de noz advocat et procureur oudit bailliage ait esté envoyee par devers noz amez et feaulx gens de noz comptes, ainsi que mandé avions par nosdictes autres lettres, lesquelles gens de noz comptes, veues ladicte informacion et autres choses qui faisoient a veoir et considerer et eu sur ce deliberacion entr'eulx, ayent donné leur consentement et expedicion sur ce, ainsi que par leurs lettres nous est apparu, pour ce est il que nous, consideré ce que dit est, la loyauté et obeïssance que tousjours avons trouvee es habitans de ladicte ville de Clermont, voulens pour ce et aussi en la faveur et contemplacion de nostre amé et feal chancelier Martin, evesque de Clermont, augmenter et decorer ladicte ville de Clermont, avons creé et establi et par ces presentes de grace especial et auctorité royal creons et establissons une foire audit lieu de Clermont chascun an, ledit jour de saint Blaise ; voulans et octroyans qu'on y puist vendre et acheter toutes denrees et marchandises licites, comme l'en fait et fera es autres foires et marchiez du païs d'Auvergne. Si donnons en mandement par ces presentes au bailly de Saint Pere le Moustier et a tous noz autres justiciers ou a leurs lieuxtenans et a chascun d'eulx endroit soy que lesdiz esleuz, bourgoiz et habitans de Clermont et leurs successeurs facent, seuffrent et laissent joïr et user paisiblement et plainement de noz presentes grace, creacion, establissement, voulenté et octroy et facent crier et publier a son de trompe, se mestier est, ladicte foire, en y establissant places, estaulx, loges et autres choses necessaires comme ilz verront au cas appartenir, et faisans tenir les marchans en seurté et joïr des autres privileges, droiz et franchises qu'ilz ont acoustumé de user et joïr es autres foires [ 185 v] dudit païs. Car ainsi nous plaist il estre fait. Non obstans quelzconques ordonnances, mandemens ou defenses a ce contraires. Donné a Mehun sur Evre2 etc.