Autre lettre pour oster la coustume de regnier Dieu1

Charles, filz du roy de France, regent le royaume, daulphin de Viennois, duc de Berry, de Touraine et conte de Poictou, a tous etc. Savoir faisons que nous, ayans en tres grant desplaisance et non sanz cause la maniere de longtemps acoustumee par tout ce royaume de blasphemer, renyer, maugreer et despiter le nom de Dieu nostre createura et de la glorieuse Vierge Marie sa mereb, doubtans, ainsi que vraissemblablement est a doubter, que a ceste occasion et achoison nostredit Createur entre autres choses ait permis a venir en cedit royaume pluseurs tribulacions et afflictions et voulens comme bon catholique oster a nostre povoir ladicte mauvaise coustume et nostredit Createur et sa benoite mere estre louez et adorez comme il appartient, avons commandé et defendu et par ordonnance expresse commandons et defendons que aucun, de quelque estat qu'il soit, ne maugree, renye ou despite d'ores en avant le nom de Dieu ne de la glorieuse Vierge Marie sa mere, sur peine d'estre pour la premiere foiz puny pecunielment a l'arbitrage du juge soubz qui il fera ledit maugreement, renyement ou despitement depuis la somme de V solz parisis jusques a la somme de XX solz parisis a applicquer au seigneur du lieu, en doublant la somme pour la seconde foiz et en la tripplant pour la tierce, et pour la quarte et au dessus d'estre puny corporelment selon l'enormité du cas et la qualité de la personne a l'arbitrage et discrecion de justice, en maniere toutesvoies que ce soit exemple a tous autres ; et avec ce, que celui ou ceulz qui seront presens la ou on blasphemera le nom de Dieu ou de la glorieuse Vierge Marie, se ilz ne le denoncent a justice dedens un jour ou dedanz deux au plus tart, soient puniz a la moitié desdictes peines, et pareillement les justiciers se ilz delayent a leur escient de faire et executer ce que dit est. Si donnons en mandement par ces presentes au bailly de Montargis ou a son lieutenant et a tous les autres justiciers et officiers de ce royaume ou a leurs lieuxtenans que nostre presente ordonnance ilz facent tantost et sanz delay crier et publier d'ores en avant de mois en mois par tous les lieux acoustumez a faire criz en leurs jurisdicions, a ce que aucun ne puisse pretendre ignorance, et icelle ordonnance tiengnent, gardent et executent viguereusement et sanz depport et facent tenir et garder et executer de point en point sanz enfraindre. Voulens que au vidimus de ces presentes fait soubz seel royal foy soit adjoustee comme a ce present original. Auquel, en tesmoing de ce, nous avons fait mettre nostre seel. Donné etc. c.