École des chartes » ELEC » Le formulaire d'Odart de Morchesne » Lettres de finance » Provision a un officier a maintenir son estat

Provision a un officier a maintenir son estat

Charles etc., a noz amez et feaulx les generaulx etc. Comme nous eussions ordonné par noz autres lettres a nostre amé et feal conseiller B. la somme de M a prendre et avoir par la main de Guillaume, receveur general desdictes finances1, par maniere de provision et pour un an finy en septembre derrain passé, savoir faisons que nous, consideré ce que dit est et les grans fraiz, missions et despens que il convient faire et supporter a nostredit conseiller en nostre service, attendu la grant chierté de vivres et l'affoiblissement des monnoyes et les voyages et chevauchees que faisons de jour en jour et pour autres causes a ce nous mouvans, voulons et nous plaist et a icelui nostre conseiller avons ordonné et ordonnons par ces presentes que par maniere de provision il ait et preigne des deniers desdictes finances et par la main de Ch. la somme de tant pour ceste presente annee, a commencer de tel jour, oultre et par dessus la pension qu'il a et prent de nous et tout ainsi et par la maniere qu'il a eu et prins oudit an passé. Si vous mandons et enjoingnons que par ledit Ch. vous faites paier, bailler et delivrer a nostredit conseiller ladicte somme de tant pour le temps et en la maniere que dit est. Et par rapportant ces presentes et quittance suffisant sur ce, ladicte somme de tant sera allouee es comptes etc. partout ou il appartendra etc. Donné etc.


1 Derrière ce Guillaume, et plus bas Ch., se dissimule à nouveau Guillaume Charrier, cité dans plusieurs des formules précédentes. Comme Guillaume Charrier a été receveur général au plus tôt en novembre 1418 (voir ci-dessus, formule [8.10]), et que le texte fait référence à des lettres impliquant déjà Charrier et données en septembre derrain passé, on peut proposer le mois d'octobre 1419 comme terminus a quo de l'acte-source.