Mauricius, Dei gratia, Parisiensis episcopus, ecclesiæ sanctæ fidelibus, salutem : Notum fieri volumus universis, tam presentibus quam futuris, quod Paganus, miles, dedit in puram et perpetuam elemosinam ecclesiæ Sarnaii et monachis ibidem Deo servientibus totam terram suam quæ dicitur feodum de Crechiis, liberam ab omni censu, decima et campiparte, ad granchiam construendam, continentem circiter centum sex arpenta terræ, contiguam ex una parte cheminio tendenti de Bonnella ad Mollerias, et ex alia parte terris de Pommereto, et ex alia cheminio tendenti de Sarnaio ad Mollerias et terris dictarum Moleriarum, cum sex arpentis prati vel eo circa sitis in eodem loco, contiguis terræ supradictæ de Crechiis, ex una parte, et ex aliis partibus terris de Pommereto. Presente et hoc donum confirmante Guillermo Bisheron, ad cujus feodum terra illa et prata pertinebant, Hodone filio suo et Heremburge filia concedentibus. Et Goscelinus de Lymoiis, miles, dedit præfalæ ecclesiæ totam terram suam sitam in eodem loco, etiam liberam ab omni censu, decima et campiparte, continentem circiter centum octoginta quinque arpenta teræ, contiguam ex una parte supradictæ terræ de Crechiis quam dedit præfatus Paganus, et ex alia parte terris et jardinis de Pommereto, et ex alia viæ quæ ducit de Sarnaio a Chaumucon, cum frechiis in eodem loco sitis super lapricia, contiguis terræ supradictæ ex una parte, et ex alia bosco et terræ dicti Goscelini de Lymoiis militis. Et etiam præfatus Goscelinus dedit prædictæ ecclesiæ nemora sua sita in eodem territorio, in montibus et vallibus, continentia triginta et quatuor arpenta vel eo circa, sicut distenduntur in longitudine, secundum viam quæ ducit de Chaumucon apud Sarnaium, contigua ex una parte in latitudine prædiclis frechiis, et ex alia parte terris granchiæ Sancti Clari. Hoc autem, ut firmius teneretur, Gaufridus de Vallegrainosa et Buchardus de Coldreio, milites, de quorum feodo supradictæ terræ, nemora et frechia erant, omnia prædicta, cum omni jure, dominio et omnimoda justicia quæ in eis habebant, tanquam domini capitales, libera et quieta monachis dimiserunt, concesserunt et quietaverunt, nichil sibi nec hæredibus suis juris, justitiæ seu dominii in præmissis retinentes, Aia uxore dicti Gaufridi de Vallegrainosa assensum præbente in omnibus. Fratres etiam dicti Buchardi de Coudreio Guido, Herveus, Fromundus ; Maheius Gruel et uxor ejus et filiæ Helvisa, Agnes, Eremburgis laudaverunt et sacramento fidei firmaverunt. Quod inconcussum teneatur in futuris temporibus, sigilli nostri auctoritate roboravimus. Hujus rei testes sunt : Galterus capellanus, Ascelinus Parisiensis canonicus, Arnulfus decanus, Orricus presbiter, Guillermus de Fabricis, Symon de Braye et Herardus frater ejus, Adam de Braye, Thomas marescalus, Rambouth et Ebroinus nummularii. Actum publice Victoricii, anno ab incarnatione millesimo centesimo sexagesimo secundo, episcopatus vero nostri anno tertio.