Hugo, permissione divina, Carnotensis ecclesie minister humilis, universis presentes litteras inspecturis, salutem in Domino : Noveritis quod Philippus de la Baaste, miles, et Aales, ejus uxor, recognoverunt se vendidisse abbati et conventui Vallium Sarnaii, pro mille libris parisiensibus, salvo jure ecclesie Carnotensis, totam decimam suam de Boenvilla et de Abluiis, quam prius obligaverant et impignoraverant eisdem monachis, prout in litteris bone memorie Galteri predecessoris nostri ipsa impignoracio continetur1. Dicta etiam Aales dotalicium, si quod in dicta decima habebat, in manu nostra, spontanea voluntate et de assensu dicti mariti sui resignavit, fidemque dederunt corporalem ipsi Philippus et Aales coram nobis quod contra vendicionem, ratione dotalicii vel alia quacumque ratione, per se vel per alium non venirent, nec in dicta decima aliquid reclamarent nec facerent reclamari. Preterea Petrus, presbiter et persona ecclesie de Boenvilla, donacionem istam coram nobis voluit et concessit. In cujus rei testimonium et munimen, presentes litteras, ad peticionem dictorum Philippi et ejus uxoris, et Petri, sigilli nostri impressione duximus roborandas, dictam vendicionem confirmantes. Actum anno gratie millesimo ducentesimo tricesimo quinto, mense februario.

Collatio prescriptarum duarum copiarum, ad requestam magistri Johannis Bodin, procuratoris religiosorum abbatis et conventus Vallium de Cernay facta est, cum originalibus minime signatis, sigillatis tamen, videlicet originale prime copie preinserte2, sigillo rotundo in cera viridi cum duplici cauda impendente impresso ; originale vero secunde copie sigillo oblongo in cera crocea impresso cum duplici cauda in filis sericeis rubei coloris impendente : dictis originalibus visis per magistrum Guillelmum Berruyer, Roberti Lecomte, presbiteri, procuratorem ad hoc vocatum. Actum in parlamento, vicesima secunda die januarii, anno Domini millesimo quingentesimo decimo octavo.

1 « Dupré.