Omnibus presentes litteras inspecturis, officialis curie Parisiensis, salutem in Domino : Notum facimus quod Nicholaus de Marliaco, filius quondam defuncti Guillelmi, filii quondam defuncti Gaufridi, recognovit se dedisse et im perpetuum concessisse abbati et conventui Vallium Sarnaii, in escambium perpetuum, quamdam vineam, sitam, ut dicitur, in vico qui tendit de Carolivanna ad Alpetum, que vocatur vinea de Punta, in censiva Heloysis dicte Plus-Belle, ad unum obolum, ut dicitur, censualem. In cujus rei recompensationem, dicti abbas et conventus eidem Nicholao dederunt et concesserunt, permutationis nomine, quamdam vineam sitam in territorio, qui vocatur Belle-Noe, immediate contiguam vinee monialium de Sancto Cirico, ut dicebat idem Nicholaus ; quam quidem vineam idem Nicholaus et ejus heredes, permutationis nomine, perpetuo possidebunt. Promittens, etc............ Dicta vero Heloysis, de cujus censiva dicta vinea de Pungta movet, ut dicitur, et Stephanus, ejusdem Heloysis filius, dictam permutacionem voluerunt, et quittaverunt quicquid juris et dominii et juridictionis habebant et habere poterant, quocumque modo, in predicta vinea de Punta ; tali pacto adjecto, ut dicebant, quod eundem censum et iddem dominium, quem et quod habebant, ut dicebant, in dicta vinea de Punta, habebunt in posterum super vinea de Belle-Noe supradicta ; et hoc iddem voluit idem Nicholaus coram nobis. Et de hiis tenendis et de non veniendo contra in posterum dicti Heloysis, Stephanus et Nicholaus se, fide in manu nostra corporaliter prestita, obligarunt. Quod autem audivimus, hoc testamur, salvo jure alieno.

Datum anno Domini millesimo ducentesimo quadragesimo septimo, mense novembri.