" Littera prepositure de Vernone, de relaxatione cujusdam pecie terre a Theobaldo Charpentario quam minus juste detinebat. "
- A Original en parchemin. — Inv., p. 74, l. 3, nº 11.
- a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
Universis tam presentibus quam futuris presentes litteras inspecturis, Petrus de Portu, tunc temporis prepositus Vernonensis, salutem in Domino : Noverit universitas vestra quod cum Johannes, dictus Chevalier, de Pormor, et Amelina, ejus uxor, cedissent quondam et concessissent, intuitu pietatis et pro salute animarum suarum, religiosis viris abbati et conventui Vallium Sarnaii se et omnia bona sua1, mobilia et immobilia, ubicumque existencia, et inter alia quamdam peciam terre arabilis, sitam inter terram Thome, dicti l'Estormi, ex una parte, et terram canonicorum de Salicosa et terram dicti Gudet, ex altera ; et dictus Johannes et dicta Amelina dictam peciam terre postea dedissent et concessissent in matrimonium Ysabelli, filie dicte Ameline et filiastre dicti Johannis, quam Theobaldus Carpentarius duxerat in uxorem, tandem dictus Theobaldus et prefata Ysabellis, ejus uxor, attendentes se non habere justum initium sive justam causam dictam peciam terre detinendi, cum antea dictis religiosis collata fuisset, ut dictum est, ipsam eamdem peciam terre et quicquid juris habebant seu habere poterant in eadem dictis religiosis quittaverunt et omnino dimiserunt, coram nobis, pure et simpliciter, absque ulla contradictione seu reclamatione sui vel heredum suorum de cetero facienda. In cujus rei testimonium, sigillum prepositure Vernonis, ad petitionem dictorum Theobaldi et Ysabellis, ejus uxoris, presenti carte dignum duximus apponendum. Actum .
