A tous ceulx qui ces présentes lettres verront, Michel de Champront, chevalier, baron de Croissi, seigneur de la Bourdinière, Montanville, Flacourt, Meufves et Villecoy, conseiller du roy nostre sire, bailly et cappitaine de Chartres, salut : Sçavoir faisons que par devant Jehan Guignard l'esné, notaire royal à Chartres, révérend père en Dieu monsieur Mº Charles Guillard, par la permission divine, évesque de Chartres et abbé commandataire de l'abbaye des Vaulx de Cernay, après ce qu'il a dict n'avoir moyen satisfaire et payer la somme à laquelle, pour sa portion à cause de sadicte abbaye, il a esté taxé et cottizé par les esleuz commis et depputez du clergé dudict diocèse de Paris, pour le département des deniers permis par le roy nostre sire estre mis sus pour le rachapt et retraict des biens venduz de l'église, suyvant l'éedict sur la vente et alliennation d'iceulx, sans vendre des plus incommodes, moings utilles et prouffitables héritaiges et revenu de sadicte abbaye, et que congnoissant que ung droict de cens montant à 20 ou 22 solz tournoys de menuz cens, deubz par chacun an, au jour de feste sainct Remy, par plusieurs personnes et pour plusieurs héritaiges, assis au villaige de Saussay et és environs, en la parroisse de Jouy, près Chartres, et sur une maison et jardin assis en ceste ville de Chartres, qui en doibt par chacun an, audit jour S. Remy, ung nommé Le Villain, cordonnier, demourant à Chartres, propriétaire de leur lieu, qui est assis près le pressouer, devant et à l'oposite de l'Aumosne Sainct André, sont des moings utilles, commodes et moings prouffictables à sadicte abbaye ; lequel lieu de Saussay est distant d'icelle abbaye de dix lieues ou environ, a, pour le grand prouffict d'icelle abbaye, vendu, cédé, quicté, transporté et délaissé dès maintenant à tousjoursmais à noble homme Pierre Grenet, seigneur de Lochey, demourant à Jouy, ledit droict de cens montant à 20 ou 22 solz tournoys ou moings, pour et moyennant la somme de cinquante une livres tournois, etc.......

Faict à Chartres, le lundi sixiesme jour de novembre, l'an mil cinq cens soixante quatre1.