Universis presentes litteras inspecturis, frater H........, dictus abbas et conventus Domus-Dei de Trappa, Cisterciensis ordinis, salutem in Domino : Noveritis quod cum nos haberemus viginti solidos parisienses annui redditus in censibus de Essartis, ex dono et elemosina bone memorie Symonis, quondam comitis Leycestrie, domini Montisfortis1, et viri religiosi abbas et conventus Vallium Sarnarii, predicti ordinis, haberent decem solidos turonenses annui census super tenementis de Haravillari et de Mesengeria, que tenebat de ipsis heres defuncti Rogeri de Hardena, quondam militis, pro dicto censu et homagio, nos, de communi assensu, commutationem fecimus in hunc modum, videlicet quod nos volumus, concessimus et penitus quittavimus predictis religiosis predictum redditum, quem habebamus apud Essartia, cum omni jure quod in eodem redditu habebamus et poteramus habere. Et ipsi abbas et conventus Vallium Sarneii concesserunt, voluerunt et nobis penitus dimiserunt et quitaverunt predictum redditum decem solidorum et homagium et totum jus, dominium, possessionem et proprietatem que habebant et poterant habere in predictis tenementis de Haravillari, Mesengeria et censu et pertinenciis eorum quoquomodo. Et ut hoc maneat firmum et stabile in perpetuum, dedimus predictis religiosis presentes litteras sigilli nostri munimine roboratas, per quas obligavimus nos ad hoc quod non possumus venire contra commutationem supradictam. Actum anno Domini Mº CCº LXXº quarto, kalendas aprilis.