A touz ceus qui ces lettres verront, Jehan Ploiebaut, garde de la prévosté de Paris, salut : Sachent tuit que par devant nous vint en jugement Jehan de Maante, de Mally-le-Chastel, si comme il disoit, et afferma et reconnut en droit que, comme il ait pièça donné, à touzjours1 à tenir perpétuelment, après son décès, à religieus hommes et honestes, l'abbé et le couvent des Vaus de Sernay et à leur successeurs, une pièce de vingne que ledit Jehan de Maante avoit en plain champ ou vingneron de Malli ; et icelle pièce de vingne ledit Jehan ait baillié à tenir le cours de sa vie à Nicholas Enguerren et à Marie, sa fame, par certeinnes convenances eues entre eus ; et icelui Nicholas soit alez de vie au trespas, la fame d'icelui Nicholas ladite pièce de vingne ne face pas ne ne maintiengne labouré ne coutivé en la manière que elle doit, et icelui Jehan contre ladite fame ne fasse pas son droit pourchacier ne requerre, ycelui Jehan, pour Dieu et en aumosne, quita, octroia et délessa au devant diz religieus, à leur église, à leur successeurs et à ceus qui de eus auront cause, tout le droit et toute l'action qu'icelui Jehan avoit, povoit et devoit avoir, par quelcunques cause ou reson, en ladite pièce de vingne, envers la fame dudit feu Nicholas et envers touz autres, pour reson d'icelle pièce de vingne, à demander et pourchacer desdiz religieux contre toutes persones, comme leur propres chose, les couz et domages, si aucuns en i avoit, etc................ En tesmoing de ce, nous avons mis à ces lettres le seel de la prévosté de Paris, l'an de grace mil CCC et onze, le mercredi après la feste saint Pierre et saint Pol.