Universis presentes litteras inspecturis, officialis curie Parisiensis, salutem in Domino : Notum facimus quod Eremburgis de Bretesca, relicta defuncti Rogeri, quondam sutoris, asseruit quod ipsa, ex conquestu suo, habebat et possidebat terras et vineas inferius annotatas, videlicet quamdam peciam terre arabilis, vocatam la Favière, contiguam terre Johannis Blondelli, ex una parte ; item ab oppositis dicte pecie quamdam aliam peciam, contiguam terre Martini, dicti de Familia, ex una parte ; item quamdam peciam terre, sitam apud Bretescam, vocatam la Longuerae, contiguam terre dicti Martini de Familia, ex una parte, et ex altera, terre monachorum Vallium Sarnai ; item quandam peciam terre, tria quarteria vel circiter continentem, sitam ad viam de Stagno juxta Mancellum-Lapidorum ; item dimidium arpentum vinee situm apud Stagnum juxta les Neffliers, contiguum, ex una parte, vineis dictorum monachorum ; item et dimidium arpentum vinee situm apud Malliacum, in loco dicto les Groes, contiguum vinee Johanneti Demoie ; quas siquidem terras et vineas, prout se comportant in longitudine et latitudine, prefata Eremburgis dedit coram nobis, contulit et concessit, ob remedium anime sue, in puram et perpetuam elemosinam, et recognovit se dedisse, contulisse et concessisse, pure et simpliciter, facta donacione inter vivos, religiosis viris abbati et conventui monasterii Vallium Sarnai et eorum monasterio1, excepto tantummodo usufructu quem in eisdem terris et vineis sibi retinet quamdiu vixerit ipsa Eremburgis ; cedens eisdem religiosis, etc.................

In cujus rei testimonium et munimen, sigillum curie Parisiensis, ad petitionem ipsius Eremburgis, presentibus litteris duximus apponendum. Datum anno Domini Mº CCº LXXº tercio, die jovis ante Nativitatem beati Johannis Baptiste.

1 Jordanus.