A touz ceus qui ces présentes lettres verront et orront, Guillaume Malenfant, garde de la prévosté de Montleheri, salut : Sachent tuit que par devant nous vindrent en propres personnes Jehan, dit Latire, de Bruières le Chastel, et [Ysabel], sa fame, si comme il disoient, affermèrent en droyt par devant nous que il avoient, tenoient et poursuivoient, de lour propre conquest, si comme il disoient, mesons, terres, vingnes, jardins, assis en la parroisse de Saint Sauveur-sur-Escolle, touz lesquiex héritages desusdiz et touz autres que il avoient en ladicte paroisse se plus en y avoient, il congnurent que des ores à touzjourz mes il avoient donné et délessé, donnèrent et délessièrent, en pur don, en pure amosne, don fet entre les vis, senz espérance de james rapeler, à hommes religieux et honestes, l'abbé et le couvent des Vaus de Sarnoy et à leurs successeurs, en tele manière toutevois que se il avenoit (que Agnès), fille desdiz Jehan et sa fame, eust her de son propre cors, que lesdiz héritages retornisent et veinsent à leur (devant) dicte Agnès ; et en recevent lesdiz Jehan et sa fame, tout le cours de leur vie, touz les ufruiz des héritages devant diz, et tout le cours de la vie à ladicte Agnès, leur fille, si comme il disoient. Promectanz, etc......................

En tesmoing de ce, nous, à leur requeste, feimes seeller ces lettres du seel de la prévosté de Montleheri par Guillaume de la Chapelle, garde dudit seel. Données en l'an de grace mil trois cenz cinq, le vendredi devant la feste saint Lorant1.