A touz ceus qui ces lettres verront, le baillif de Gysorz, saluz : Comme contenz fust meu entre Robert Chevalier, d'une part, et hommes religieus, l'abbé et le couvent de Sarnay, de l'autre, sur ce que iceli Robert leur demandeit un héritage, c'est assavoir une meson, une vigne, cens et rentes à cel manoir apartenanz, assis en la paroisse Saint Martin de la Roquete, entre la méteerie Roger le Chevalier, d'une part, et la terre qui fu Guillaume de la Place, de l'autre, de la succession Jehan Chevalier, son père, mort, et de quoy il estoit vestu et sesy comme de son droit héritage, si comme il diseit, quant il ala de vie à mort ; lesdiz religieus proposanz et disanz encontre, à leur défense, que ledit Robert ne deveit pas estre oy en sa demande, quer ledit Jehan, père audit Robert, en tens que il viveit, en son bon estat et en sa bone santé, aveit donné ausdiz religieus tout ledit héritage2, et d'emprès icel don fet si sollempnement comme droit et reson requièrent et par lettres pendanz de seel auctentique seelées, il estoient entré en sesine pesible et en plenière possession de tout ledit héritage, et les fruiz en avoient levé et les rentes, en affermant le titre deu don de la propriété deu dit héritage, et emprès ce, iceus religieus, de leur volenté, avoient ballié la sesine de cel héritage audit Jehan à porseer et à tenir comme un estrangé, en non desdiz religieus. Sur ce, de la partie deu dit Robert contre lesdiz religieus contestation fete sollempnement et mises en nie par iceli Robert toutes les choses desusdites en la forme et en la manière que eles estoient proposées desdiz religieus, une veue sur ce assise et tenue souffisaument entre lesdites parties, et jour certain assigné ausdiz religieus à prouver leur entente contre ledit Robert ; sachiez que à la parfin, en l'assise qui fut à Andely l'an de grace mil II^e IIII^xx et noef, le vendredi emprès la Translation seint Beneet, présentes lesdites parties par devant nos, trouvé fut et ateint tout clerement par grant foison de bons tesmoings et leaus clers et lays, receuz par acort desdites parties, jurez et diligeaument examinez, que lesdiz religieus proposoient et disoient vérité contre ledit Robert en toutes les choses desusdites ; et pour ce, ledit Robert choit de sa demande deu tout, et lesdiz religieus s'en alèrent comme quites et défenduz deudit Robert en la sesine et en la propriété de l'éritage desusdit comme par leur droit titre. En tesmoing de laquel chose, nos, à la requeste desdiz religieus, avons seelé ces letres deu seel de la ballie de Gysorz, sauve la droiture le Roy et l'autrui. Ce fu fet l'an et le jour et l'assise desusdiz.